Wintjertied
Aafgeloupe nach is de klok verzatte. Wie de kinjer nog klein woore kós ich twieë kieër ’t sjaemele grepke make det dae nach de klok verzatte woor. En of ze efkes wooje gaon kieke woeë de klok noe den in godsnaam oething. Det wèrkdje eine kieër biej de aodste en eine kieër biej de jóngste. Neet good genóg óm dökker te gebroeke. Te väörspelbaar.
Minstes zoeë väörspelbaar is de diskussie die noe twieë kieër per jaor oetbrèktj äöver ’t nut van de zomertied en de wintjertied. ‘T bliektj echt rampzalig slecht te zeen väör ós. Huer en laes ich dees waek op väöl plaatse. Get mèt de biologische klok, seizoene, cyclusse en weit ich neet waat nog mieër. Ein óngezónje tradisie!!
Met tradisies, en den väöral ós tradisies, liektj vanalles mis te zeen. Sinte Merte waerdj vervange door Helloween. Sinterklaos waerdj in ziene eige zak gestoptj en retour gestuurdj. En op 1e kerstdaag zeen gewuen alle supermerte aope óm de deadline van ’t kerstmenu neet ‘t definitieve doeëdvonnis van ’t kerstmenu te laote zeen. Óm te passe in deze “perfekte” waereldj, mótte wae mèt de tied mètgaon. Soms snap ich det. Mer de toleransie, die van ós miense die get gaeve óm tradisies waerdj verwach, mis ich volledig biej de miense die vinje det ’t allemaol anges mót. Tradisies en mèt de tied mètgaon, det vlooktj.
In plaats van ós drök te make äöver det oor ekstra of minder slaop in mieërt en oktoeëber, liektj ’t mich, det we messjien ouch efkes mót óngerzeuke of saoves óm 9 oor boeëdsjappe doon, midde in de nacht op internet get bestèlle of toet half zès smörges op ein event of festival blieve hange ouch get duit mèt oze cyclus. Of ’t feit det op vandaag alles 24/7 besjikbaar mót zeen ouch ein gezónj noew tradisie is. Is ’t neet zoeë det de moderne tied ós biotrime mieër verstuerdj den ein verzatte klok? Örges in dit laeve höb ich eine aafsjlaag gemis. Zeen wae echt in ein samelaeving terech zeen gekome, woeë in groeëte groepe miense echt allein nog mer op zunjigmiddig óm twieë oor de waekelikse boeëdsjappe kènne doon? Väör eine kieër bön ich ’t mèt de biebel èns. “Op de 7e dag ruste hij.” As det gein gezónj tradisie is!
As det waat de deskundigen sjrieve waor is, zooj ich ’s beginne in de wintjer mèt eine minder volle agenda. De kortere daag akseptere. Neet gaon äöverwintjere in Spanje óm ’t sezoen mer äöver te slaon. Aete waat ’t sezoen brèngtj, oppe tied eine herfstbock, ein dampendje jachtsjöttel of eine tèjer erwtesoep en mieër den geregeldj ein wanjeling door de vallendje of gevalle blajer. En daonao lekker väör de aope haard of biej de kachel, mer ich weit neet of det allewiel nog moog.
Mèt alle probleme en krisisse die we al höbbe in dit landj, mótte we de vraog äöver wie laat ’t noe eigelik echt is, mer efkes naeve ós neerlègge. Dae tied kènne we waal zinvoller invulle liektj mich. Door aaf en toe de tied te neme.
Gr Hans