Werm

T’is d’r werm aan. Bliekbaar bön ich neet de enige dae d’r las van haet want de gezèt, de tillevisie en de äöverheid höbbe ’t d’r mer drök mèt. Niks kómkómmertied. Code gael, ’t nasjonaal hitteplan en advieze as “gank neet naaks slaope” en “doesj dich neet te kaod” waere äöver ós haer gestortj óm ós in eder geval zoeë good mäögelik door deze krises haer te helpe.

“T’is zoeë heit det de mösse van ’t daak valle!!” Nou in det geval is vandaag eine gemekkelikke daag óm emes bliej te gaon make mèt ein doeëj mös, dink ich den mer. Röstig blieve en örges in de sjeem diene tied ein bietje ómlummele liektj mich baeter. En oppe tied get drinke anges höb’se gein vocht mieër óm te zjweite. Dao haet nemes eine hitte-coach väör nuedig.

Mer ’t zal allemaol waal. Óm noe vanaovendj ónger eine werme doesj te gaon staon? Geit zeker neet gebäöre! Naaks slaope? Doon we zeker neet, want wae höbbe mögke. Van die irritante bieëste die’se nörges zuus en zoeë wie’se de lamp oet duis begintj de terreur. Lamp aan en waat dink’se? Gein mök mieër te zeen. Ein saort van spel det oore kèn doore en woeë’se dich zoeë biej in ’t zjweit kèns meppe en ergere desse niks lever duis as oeteindelik ónger eine kaoje doesj springe. Mer ouch neet sjlum van die mögke. Doe zoot’s zègge det die nao al die jaore toch wal biejgelieërdj haaje en det ’t mèt eine stillere motor toch väöl mekkelikker skore is as mögk. Ich verdink ze d’r van, det ze deze taktiek mèt opzèt hantere. Oeteindelijk vèlse toch wal in slaop en den höbbe ze dich alsnog. Det zeen döbbele puntje. Dich daag’s d’rnao gebraoke en den ouch nog ‘s de ganse daag jäök höbbe.

Gr Hans