Werm bad
De zón is kwiet. Óngertösse geit ’t mèt dees daag neet mieër äöver eine witte kerst, mer äöver of we de zón nog oeët trök zeen. Bezitters van zónnepanieële zitte in zak en as en ouch ich zooj ’t leecht waal weer ’s wille zeen. Op zeuk nao wermte of ein werm bad, höb ich gelökkig nog waal get alternatieve. Neet de badkuup, want det is allewiel echt te väöl bade in luxe.
Meziek is ein van die dinge woeë ich mich in kaoj en duustere tieje waal aan kèn werme. Leefst örges in eine zaal zittendj of staondj neet te ver van de buhne zoeëdet ich de artieste ouch echt kèn zeen. De gelaegehede woeë ich kóm, kènne zónger meute allemaol Theater van ’t Sentiment geneumdj wäöre. Qua laeftied en haorkläör, val ich op die plaatse mer zelde mieër oet de toeën. Allemaol miense die weite des se edere kans mós aangriepe óm dien helde van vreuger nog eine kieër te zeen sjittere. Tis neet det ich de meziek van noe neet good genóg vinj, mer eder generasie haet recht op zien eige helde.
Zoeë moogdje ich aafgeloupe waek nao The Beatles en nao de Janse Bagge Bend. The Beatles höb ich vreuger mótte misse ómdet die nao mien gebaorte beslaote neet mieër op te traeje. Hieël flauw. Janse Bagge höb ich vreuger dök zat gezeen en gehuerdj, mer herhaling hèltj mien herinnering fris en laevendj. Zoeëwaal The Beatles as Janse Bagge Bend woore neet kompleet dees kieër. Van de Beatles kòste de 4 lede van de orzjinele bezètting neet, mer de vervangers genaamdj The Analogues deeje eigelik alles good of messjien nog wal baeter.
Van Janse Bagge kós allein Henk op zunjigmörge oppe tied in Böggeme zeen. De res mós nao de kèrk, mèt de wanjelclub mèt, haaj de slaop nog neet oet of woor bang det ze nao ’t optraeje ouch nog verplicht de obstacle run móste doon biej Home of Heroes. Gein probleem det goof Henk de ruumte óm ouch neg get sjoeën leedjes van Carboon te spele.
Waat The Beatles mèt janse Bagge Bend verbindj is det ze allebei häöre tied ver väöroet woore. Eder op häör eige meneer. Óngersjeijend good. The Beatles väöral mèt meziek dae 55 jaor later nog neet gedateerdj klinktj en The Bagge mèt tekste die 40 jaor later nog steeds aanslaon en dök aktueel zeen. ’T Kumptj allebei bènne biej mich. Steijvers en McCartney op ein A-4ke in ein waek. Väöl baeter kèn ’t neet wäöre. Here comes the sun!!
Gr Hans
