Waer of gein waer.
D’r is gein dingk waat zoeë dök óngerwerp van gesprek is as ’t waer. Is ouch hieël gemekkelik. ’t Waer is altied en äöveral. Ómdet we ’t kènne zeen en/of veule, kènne we d’r ouch altied get van vinje. As ’t dich neet aansteit kèn se d’r same äöver klage. Wäöre we verwèndj mèt ein zunke en ein lekkere temperatuur den is ederein kontent. De mekkelikste vorm van verbinjing.
Vreuger woor ’t tiedstip det ‘t waer oppe radio of tillevisie kwoom ’t moment det ós käöke of kamer tiedeliek ein saort van stiltegebied mós zeen. Waer waas erg belangriek biej ós toes. Óm te weite of de greuntje good kós gruuje en of de postdoeve gelostj kóste wäöre. Neet zelde huuërdje ich de kreet “ze belaove vanalles, mer dao zal waal weer niks van oetkome!!” De belangriekste äövereinkomst tösse waer en politiek, noe ich d’r zoeë aan trök dink.
Waer haaj ein herkènbaar gezicht. Pelleboer op dónderdigmiddig half ein as ich ’t mich good herinner. Bie de Tros op Hilversum 3. En op BRT 1 Armand Pien, “De Weerman”, nao ’t noets van half 8. Die miense vertèldje neet äöver ’t waer. Nae, die woore ’t waer. In de loup van de tied höbbe Pelleboer en Pien waal get opvolgers gehadj. Piet Paulusma woor jaorelang ein boegbeeld en benaderdje Pien en Pelleboer. Bie de NOS en de VRT haat se later get mieër aafwisseling. Mer ’t waas get mieër wetensjappelik en minder óngerhaojendj.
L1 haet jaorelang aan ’t waerberich mèt ein gezich vastgehaoje. Thijs Zeelen en Léon Rademakers wäördje BL’ers ómdet ze ’t waer verbónje mèt de plaats woeë wae woeëne en laeve. Äöver de raejene wèróm det ’t inèns anges mós, gaon ich neet. Jaomer vónj ich ’t waal. Bliekbaar waas 30 sekonde waer tösse de soep en de èrpele inèns ouch good genóg. Niks is väör altied. Det dach ich toetdet ich örges in de lèste waeke op L1 inèns weer vief menute foto’s van de sjoeënste plekske róndjóm ós haer väörbiej zoog kome. Väöl foto’s die ’n jaor gelaeje nog ónger ’t waerberich zoote. Den is de stap nao ein waerberich ónger die foto’s ouch neet hieël groeët mieër. Achteroetloupe is ouch bewaege.
Inmiddels kiek ich väör ’t waer 20 kieër per daag op miene tillefoon. Zeen ich det ’t waerberich zoeëget óm ’t oor verangerdj. De väörspelling väör äöver vief daag kloptj dökker neet den waal. ’t Waer lötj zich op dees meneer neet mieër vange en liektj inmiddels ouch dök op feek-noets. Doe kèns d’r neet echt mieër van op aan. De belangriekste äövereinkomst tösse waer en politiek, dink ich noe.
Zeker in tieje woeë in wae toch al neet verwèndj wäöre mèt good noets verlang ich waal ’s trök nao zón aojerwèts waerberich. Want wie slecht det berich ouch woor, ’t wäördje in eder geval good gebrach.
Gr Hans
