Wachte op de Piano Man
As leefhöbber van meziek en van liesjes, zeen mien lèste waeke van ’t jaor gegarandeerdj good gevuldj. Ouch det is ein saort van tradisie. Mer wie mèt alle tradisies in dit landj, mót dao óngertösse bliekbaar get van waere gevónje. Zoeë laes ich det de Top 2000 te wit en te mannelijk is en de Bohemian Rhapsody te nummer 1. Geveulig as ich bön väör tradisies, mótte ze biej mich neet mèt zónne ónzin aankome. In mien inmiddels zeer oetgebrèdje brille kolleksie zit geine bril dae ich opzèt óm door ein angere kläör nao meziek te loestere. Waat ein bizarre gedachte.
De keuze is reuze in liesjes- en mezieklandj dus weróm dich drök make äöver angermans keuzes asse zellef ouch de vriejheid höbs óm te keeze? Zoeë bön ich d’r beväörbeeldj vas van äövertuugtj det erwtesoep en frikandel spesjaal ouch good mótte kènne mèt kerstmis. Mer ich pas mich dae eine kieër per jaor waal aan, as we op 1e kerstdaag weer sunjese soep kriege. Ouch al vèltj det op eine dónderdig.
Óngertösse merk ich waal det miene laeftied d’r väör begintj te zörge det ich langzaam eine bepaoldje aafstandj höb toet waat de meiste miense leuk vinje. Prónt wie mèt gooje wien kumptj miene favoriete meziek oet bepaoldje jaore. Drink ich nog mer zelde noewe meziek en steeds mieër mèt maote. Mer, op doktersadvies, väöral waal hieël regelmaotig. Det hooftj lang neet altied mieër groeëts, mètsleipendj, knallendj of 40 decibel te hel te zeen.
Ich dink det ich d’r waal aan zooj kènne wènne as ich de Käöningin noe mós inruule väör eine gewuuëne Piano Man. Óm röstig zónger al te väöl gedachtes en groeëte väörnemes bienao geruisloos ’t ein jaor in te ruule väör ’t anger. Zeker in eine tied woeë in lang neet edere knal ouch automaties nog ein fieësje is. Op ein good, gezóndj en väöral röstig 2026.
Gr Hans