Aafgeloupe waeke waas ’t weer zoeëwiet. Vekansie. Ich höb waal ’s gezag det ich mich toes op mien bèst veul. Mer aaf en toe ’s gans get anges is op zich neet slecht.

De groeëtste vekansiehobbel dae ich altied mót neme is de reis. Haer en trök. Zónne Duitse autowaegmarathon vertaer ich slechter as ein veer daag aod stokbroeëd. Det duit dao op ’t asfalt allemaol mer get mein ich. Väöl miense mèt ónwaarsjienlik väöl haost ouch. Ein wónjer as ’t allemaol good geit. Neet dus.

Oppe haerwaeg eine Baustelle van 70 kilomaeter. Mèt eine waeg zoeë smaal, det ich ter plekke riebaan-claustrofobie opleep. Oppe trökwaeg gefileerd in 1½ oor Stau. Zittendje meditere en lanjendje vleegtuge bekieke op ’t meurke van de middeberm bie Frankfurt. Geliek höbbe is neet altied leuk.

Woor ós vekansie den neet good? ’t Taegendeil is waor. Óndanks ’t waer genaot ich edere mörge van de ieërste blik nao boete. Ouch as ’t raegendje. Väör de res mósse prónt wie toes ’t ein en anger óngerneme. Vekansiegelök kumptj neet vanzellef. Bienao edere berg, grot of kloof die se ómhoeëg- of door-sjravels beloeëndj dich. Mèt ein wónjer der natuur desse róndjóm hoes noeët geis vinje.

Vekansiegelök is ouch ein Schützenfest woeë se toevallig biej oetkums. Woeë se mèt volslagen ónbekèndjen die toevallig ouch beer en Jägermeister löste drie ónvergaetelikke oore höbs. Miense die se neet kós en waarsjienlik noeët mieër geis zeen. Hoof ouch neet. Want baeter as dit geit ’t de volgendje kieër op dezellefdje plaats mèt dezellefdje miense toch neet wäöre.