Nao jaore van relatieve stilte is de vastelaovendj weer ein serieus thema aan ós taofel. ’t Is neet det we de lèste jaore neet mèt de vastelaovendj bezig zeen gewaes. Intaegendeil. D’r zeen tieje gewaes det vastelaovendj ein hoofdzaak waas. Daonao waas ’t ein belangrieke biezaak. Mer inmiddels is de waeg richting hoofdzaak weer ingezatte. Hoofdzaak en messjien ouch waal ein bietje noeëdzaak. Van sommige besmettinge kum se noeët mieër aaf.
DCF 1.0
Vastelaovendj is ein geveul. Get waat neet verklaordj kèn waere vanoet de anatomische weitensjap. Doe kèns snieje waat se wils in eine miens, doe geis ’t neet vinje en dus ouch neet weghaole. Get waat dich in ’t blood zit den? Of d’r oeët in is gekraope? Det blood is roeëd. Neet roeëd, gael en greun, mer gewueën roeëd. En messjien aaf en toe ein bietje aan de dunne kantj.
D’r zeen ouch miense die hieël stèllig bewaere: “Ich höbs niks mèt vastelaovendj.” Niks as in eine laege agenda mèt die daag? Niks as in ein laeg beurs, oetgeraekendj op det moment? Allebei slechte timing. Niks as in gein geveul biej de Vastelaovendj? Anno 2026 moog en kèn bienao alles, dus ouch det. Ederein ’t zien.
Vastelaovendj is väöl mieër den det waat väöl miense d’r van make of van dinke. Det begintj al in de aanloup. Dae aanloup kèntj erg langk zeen. Mèt dinge make. Kleijer, tekste, meziek, wages, evenemente, zörge det miense kènne aete en drinke en nog eine rits van zake woeë väöl miense geine weit höbbe. Behalve des se dao väöl kreativiteit in kwiet kèns, duis se väöl dinge ouch nog ’s same mèt angere. Ómdesse det leuk vinjs. Det alles mót oeteindelik biejeinkome in ein fieëst woeëbiej waerdj geprobeerdj ’t plezeer mèt nog väöl mieër anger miense te deile.
Doe moogs d’r altied väör keze gein geveul te höbbe biej vastelaovendj of biej det waat d’r in dien ómgaeving gebäörtj. Doe moogs genóg höbbe aan dichzellef of ein paar miense óm dich haer. Ederein moog d’r väör keeze geine polonais aan zien lief te wille höbbe. Mer in tieje woeë in de tillefoon väör väöl miense de bèste vrundj is en gezelsjap ein luxe artikel, is vastelaovendj ein gemekkelikke en lieëgdrempelige keuze óm óngerdeil te zeen van detgene waat miense in ein kleine gemènsjap verbindj.
