t Geheim des se deils mèt Linjeboum.
D’r zeen fases in mien laeve gewaes det ich langere tied gein beer drónk. Óm te beginne toet 2 HAVO. De bourgondische insjlaag zitj äöverdudelik in mien DNA. Biej gezelligheid mèt get jónges óngerling huertj nog steeds geregeldj ein pilske. Of allewiel eine “speciale”.
Ich betrap mich d’r op det ich in dit verbandj nog dök de term jónges gebroek. En det terwiel we allemaol korter bie de 60 zitte den bie de 50. In gedachte, zeker op de momente det we same zeen, zeen we nog gaer die jónges van vreuger. As of we neet in de gate höbbe wie de jaore väörbie zeen gegaon.
Weróm beer bie zón gezelsjap huertj? Gein idee. Ós dames snappe d’r niks van en wae vergaete op die momente hieël gaer efkes alle wieze en gezónje raod. Óntaegezèggelik zörgtj de alcohol väör get óntspanning en geliekgestumdjheid. Ich dörf ’t waord flow neet te gebroeke, want det suggereert det wae 100% gezóndj bezig zeen.
Weróm det beer? Ein deskundige óngerbouwing höb ich neet. Ich zooj kènne zègge det we mèt de Aod Vorste Kompenie in plaats van fietse, nao TNO in Delft zeen gewaes. ’T dao ómwille van ’t óngerzeuk op ein drinke höbbe gezatte. Volgeplektj mèt van die stickers en sensoren. Door óntelbare dräödjes verbónje mèt de meist sjlumme computers. Ich zooj kènne zègge det we neet nao de Formule 1 in Hockenheim zeen gewaes, mer in ’t geheim nao ein lab in Heidelberg. Óm te óngerzeuke of ’t Reinheitsgebot vat op ós zooj höbbe. Mer waem gluiftj noe zoeëget?
Same ein boswanjeling make woor messjien baeter of in dit geval gezonjer gewaes. Toet det we den toch weer ónherroepelik taege ein sjoeën terras aan zooje loupe. Soms is ’t gewuen lekker en neet hieël óngezóndj óm efkes los te laote. Óm neet altied äöveral ein verklaoring väör te zeuke. En ’t geheim? In ós geval blieftj det ’t geheim det wae hiej deile mèt Linjeboum.
Gr Hans
