Sjat GPT
As se sjtökskes sjrieve as hobbie höbs, bös se behalve emes mèt ein neet alledaagse hobbie, ouch eine óngeluifelik mazzelieër. Vreuger woor d’r ein zeekdje mèt de naam “writers block”. Op zien plat gezag “gein lètter op pepeer kènne kriege”. In de ieëwige väöroetgang van de waereldj is ouch dit probleem inmiddels verholpe. Sjat GPT is diene leefhöbbendje assistent of dien leefhöbbendje assistente in tieje van lètterdruegte. Vanaaf noe kèn gewuen ederein de meist waanzinnige stökke sjrieve.
Óntmasker ich mich daozellef noe ouch gliek mèt? Ich kèn den waal zègge det ich alles zelf oet miene moew sjöd, mer bewieze kèn ich det neet. Ein van de raejene det ich in ’t plat bön gaon sjrieve is det d’r nog neet zoeë väöl, in ’t plat gesjraeve, op internet steit. Dus, det miene Sjat GPT zich wezenloos zeuktj mer neet väöl vintj. Dao kèn ich allein mer bliej óm zeen. Want waers as ich bön, gebroek ich ’t leefst mien eige wäörd. En laot ich mich väöral neet gaer in ein door angere väöraaf gedefinieerd hökske duuje.
Asse väör sjoeël, werk, vereniging of weit ich neet waat, ein stökske mós sjrieve en ’t moog in ’t ABN, ingels, Duits, Frans of Spaans, den kèn Chat GPT diene reddendje ingel zeen. Ich zèk kèn! Want ich haop det miense zellef de meute doon, mer weit ouch det d’r al enorm väöl misbroek van waerdj gemaaktj. Op basis van de juuste vraogstèlling väöraaf, kènse edere gewinstje smaak aan dien stökske toevoege. Mót ’t get richting oze Frans? Gein probleem! Ein vleugje Geert of Donald d’r in? Kèn geregeldj wäöre. Bietje humor? Chat GPT lachtj mèt dich mèt. Prónt wie mèt kaoke, kèn se hiej eindeloos variëre. Zónger desse daonao zellef nog ’s krities de teks hoofs te bekieke. Väör de hieël duustere dinkers ónger ós, vermoed ich det d’r ouch nog waal ein alternatieve versie zal zeen die Shit GPT hètj.
As ’t óm wetensjappelik gebroek geit, snap ich gans good det Chat GPT hieël erg henjig kèn zeen ter óngersteuning. Niks baeter as kènnis die waerdj äövergedrage. Neet alles hooftj opnoe te wäöre oetgevónje. Mer waem controleerdj of ’t allemaol nog kloptj? Mósse dich neet steeds blieve aafvraoge of se ouch echt snaps waat se höbs äövergenaome? Bös se op termien nog in staot óm zelf get te bedinke as se väör de situasie kums te staon des se zelf de beslissing mós neme äöver iets waat se nog neet ieërder bös taege gekome?
Öm ’t trök te brènge nao hoes, haof en reis proporsies: doe geis nao Oeësteriek op vekansie en inèns is d’r ein internet stuering. Navigasie en tillefoon doon ’t neet. Bösse den nog in staot óm, mèt det waat se zelf wèts, op de plaats van besjtumming te kome?
Wie mèt väöl dinge zal d’r geine waeg mieër trök zeen. Hooftj trouwes ouch neet. Allein vraog ich mich aaf of ós gemaak of oze gemakzucht hiej ’t meist mèt geholpe is. Óngertösse haop ich, det as ich strakkes weer oppe operasietaofel lik en de dokters mèt mich aan de sjlaag gaon, ze väöral zellef deskundig zeen. Eigelik twiefel ich dao neet aan. Mer stèl dich väör det ich dao in ’t duuster lik te stare en den mót huere “Chat GPT geeft hier geen informatie over. Wat moeten we nu doen?” En det ’t den hieël erg lang, te lang, stil en dónker blieftj.
Gr Hans
