Ein korte mer lang neet volledige opsomming:

Mevrouw Rood K. is aangeklaagdj door die van De Wolf. Die van De Wolf besjöldige Rood K. van ’t mèt väörbedachte rade aanrichte van imago sjaaj en bewust verdrèje van feitelikhede óm zoeë ein negatief beeld van die van De Wolf te verspreide.

De gemèndje Kaatsheuvel haet ’t bezwaor det de Efteling haaj gemaaktj taege de kap van óngewenste elemente in ’t Sprookjesbos en ómgaeving óngegróndj verklaordj. Waal moog de Efteling Sneeuwwitje nao de make-over salon sture ómdet sjnieëwit oet de tied is als gevolg van de opwerming van ós planeet.

Hans en Grietje höbbe ze biej de kinjerarts flink äöver de baom gekraege. In plaats van aan ’t äövergekaloriseerde huuske van de heks te knabbele, höbbe ze ’t advies gekraege in ’t vervolg mer biej Ekoplaza verantjwoord te gaon sjranse.

Doornroosje haet de prins dae häör haet wakker geköstj aangeklaagdj vanwaege ’t versjangelere van häöre mèt zörg verwaarloosdje wilde natuurtuin.

’t Verhaol van Sinterklaos waerdj dusdanig in twiefel getrokke det miense die d’r verstandj van höbbe van meining zeen det ’t neet langer verantjwoord is ós wichter op dees meneer väör de gek te haoje.

’T Is ein kwestie van tied verwach ich, väördet de beuk van de Gebroeders Grimm en Hans Christian Andersen oppe brandjstapel terech kome. Want allemaol verzónne, dudelik neet gecheckt op feite, te akelig, rolbevestigend, stereotiep en vol mèt väöroordeile.

Waem dach det daomèt de waereld definitief verlostj zooj zeen van de sprookjes kumptj bedraoge oet. De moderne sprookjes zeen get mieër van deze tied. Verkoup dien hieël höbbe en haoje, sjaf dich crypto’s aan, stop mèt wèrke en gank genete van ’t laeve. Allein det lèste deil snap ich.