“Proemevlaai” via Hans van Pol

Proemevlaai

Degene dae ein bietje biejhèltj waat ich zoeë doon óm miene tied óm te kriege, wètj woeë dit äöver geit. Dit geit neet äöver det ich mèt Henk Hover van L1 zwarte proemevlaai bön gaon bakke. Dit geit ouch neet äöver det ich ein begrafenis höb gehadj en mich daonao aan de koffietaofel te boete bön gegaon aan mien favoriete vlaai. Zooj waal höbbe gekèndj, want de koffietaofel is zoeëget de enige plaats woeë de proemevlaai nog eine konstante faktor is. Dit stökske geit d’r zelfs neet äöver det Henk Steijvers van de Janse Bagge Bend gedwónge is óm ziene tekst van ’t leedje Proemevlaai aan te passe. Hae zingtj namelik det ‘r die ’t leefst mèt hieël väöl slaagroum ètj. Dao mósse biej de President Bekker van de Echte Limburgse Vlaai neet mèt aankome. Dae stuurtj de NVWA op dich aaf. Slaagroum?? Ein groeëte sjanj is ‘t!! Ich väörzeen ein verbanning van dit geweldige leedje oet de Limbo Top 100 väör komendj jaor.

Mer ‘t is niks van dit alles. Janse Bagge woor ein tiedje trök in ’t dörp. Det is mich daonao nog lang biej geblaeve. Laeftied, gezóndjheid en nog get anger smoesjes moke dit toch toet ein anger belaeving as de Bagge vreuger. Nou, óm mer geliek alle twiefel weg te neme, zónger beer geit dus ouch. Is waal anges. Mieër tied óm te loestere, minder tied nuedig óm de brouwerie te steune. ’T besef det de Janse Bagge Bend nao mieër as 40 jaor nog steeds neet teleurstèldj as ze op de buhne staon. Väör mich mook hieël effe ’t fieëstgeveul plaats väör de verwónjering äöver of bewónjering van de songtekste. Die zeen nog steeds hieël erg orzjineel en aktueel. Det meuktj det de Janse Bagge Bend zichzelf tiedloos haet gemaaktj.

Wie ich de mörge daonao wakker waerdje herbelaefdje ich de vriedigaovendj. Boete, mèt ein tas koffie en begeleidj door get fluitende veugelkes en de tiepiese zaoterdigmörgegeluide van klussendje, hobbiënde en sportende miense. Dach mèt väöl plezeer trök aan ein paar van die väörige kieëre det Janse Bagge Bend oze aovendj mook. In 1990 in Naer biej de voetbalclub, wie de Bagge ’t fieëstwiekend mós redde ómdet Lois Lane op ’t lèste moment haaj aafgezag. Lois Waem?, huer ich uch dinke. Of 1991, Helje kèrmis biej Apollo. Ich zal ’t zellef nog mer ’s bekènne, waat ich van dae aovendj nog weit is van huere zègge. Gebäördje in dae tied nog waal ‘s. “Det klinkt neet echt as ein kompliment väör de Bagge?”, zultj ge dinke. Ich zeen det anges. Die manne woore in staot óm ein dusdanige sjtumming te make det de gevolge in de nacht en mörge daonao verklaorbaar woore. Det maak ich d’r den mer van, 3x 11 jaor daonao.

Noe, zoeëväöl jaore later, realiseer ich mich det de tied neet haet stil gestaon. Wie geweldig ’t is det de Bagge nog steeds optraeje. Bènnekort vast wal weer örges in de buurt.