Plat
Plat is populair. Of baeter gezag, de Limburgse politiek haet ’t oug laote valle op ós dialekt. As de politiek zich mèt cultuur geit meuje, haet det altied te make mèt geld. Pötjes mèt euri’s die in dit geval mótte waere oetgegaeve. Bestaondje zake waere daobiej steevast genegeerd. Men vreugtj óm baanbraekendje ideje. Waat in feite dök neerkumptj op ’t raad steeds weer opnoe oetvinje. Ideje die mótte voldoon aan regels die bienao alles waat al besteit bie väörbaat eliminere. Regels ouch, die zoeë ingewikkeldj zeen, det ’t nog neet mäögelik waas ze in ’t plat op te stèlle. Plat is gein kwestie van steeds weer óngerzeuke (op foute plaatse. In de stad woeëne väöl mieër miense van boete de provinsie en die kalle vanzellef gein plat) en d’r äöver vergadere, mer ein zaak van gewuuën doon.
Gewuuën doon. Dao kwome we pas gelaeje ouch achter op ’t lèste stök van ós Pieterpaad. Óm te beginne moogdje we zelf vaststèlle det de leus “Er gaat niets boven Groningen” bienao gans waor is. Nao de stad Groningen kwome wae in ein saort eindeloze vlakte. Plat op zien bèst. Platter as dit besteit neet. Ein stök Nederlandj bestaondje oet wei, landj en ein inkele verzameling gebouwe. Die ze noeëdgedwónge plaatsname höbbe mótte gaeve. Anges kèn de post neet geadresseerd en bezörgdj waere. Verder dus allein mer wei en erpele. Väöl èrpele. Die waarsjienlik gedeiltelik de opdracht höbbe gekraege te wachte mèt oetkome toet volgendj jaor. Väör ‘t geval de pries väörluipig zoeë lieëg blieftj as wie d’r waas.
Groeët waas de vrees väör vervaeling mèt al det plat. Nog groeëter de angst óm oore zónger besjötting gemarteldj te waere door óngenadige taegewindj. Allemaol zörg väör niks. Waat ein genot. Sjoeën smaal paedjes tösse weije, kenale, baeke en baekskes. De enige drökdje dao, kwoom van de veugel. Die zoote d’r zat en ich snap det waal gezeen de ruumdje die ze dao höbbe. Doe mós d’r oeër en oug väör höbbe. En de windj? Dae vónj ’t allein de lèste 5 kilomaeter nuuëdig óm ouch efkes te laote weite det hae d’r waas. Te laat óm oze geweldige daag nog te verzouwe.
Of ’t noe plat in Groningen of in Limburg is, ’t blieftj ein kwestie van gewuuën doon.
Gr Hans