Ein van de lestige biekomstighede van de kwaol aan mien ouge is det ich konstant mein nog vanalles te mótte doon. Bang as ich bön óm tied te kort te kome. Bang väör det waat messjien de ieërste 20 jaor of langer neet gebäördj. Mer ich bön eine serieuze kanshöbber, dus d’r is geine tied te verleeze.

Dit alles meuktj det ich nogal ’s teväöl wil en geregeld waer trökgeflaote. Det hèltj mich neet taege óm ’t ein en anger te óngerneme. In de tied det ’t ech neet lekker ging wäördje mich steeds gezag, “doot wat waal geit”. Det höb ich mich good in de oeëre geknuiptj. Dus gaon ich noe waal ’s nao ein museum. Nao ’t theater of nao konserte, nao artieste woeë ich noeët ieërder aan gedach haaj. Nao plaatse neet wiet weg woeë ich, ouch al zeen ze dun biej, nog noeët gewaes bön. Of loester ich beuk woeë ich 40 jaor neet op höb aangekaeke. Vanalles, meist neet väör de handj liggendj.

Zoeë kwoom ’t det ich mèt gooje muziekmaot S. weer in Mestreech in ’t theater landje. Bie ein konsert van ein Franse dame. Vanaaf ’t moment det John (dae eigelik Jean hètj) Tana hip is, vinj ich det alle angere Franse meziek ouch neet mieër ’t predikaat fout moog kriege. Örges hieël ver in mien geheuge zeen de oetzendinge van Radio Tour de France oet de jaore 80 blieve hange. Väöral de meziek dae ze dao tösse de Tourflitse door speeldje. Dae meziek zoot good bewaardj in ein vergaete hersencel. Van dao oet kwoom ich vanzellef bie de get modernere Franse meziek oet.

De dame in kwestie, Barbara Pravi, zootj ge messjien kènne van ’t songfestival van 2021. In Rotterdam woor det. Ze wäördje toen 2e mèt “Voila”. Eine echte chanson. Absoluut ein gooj zangeres, mèt meist typische Franse meziek. Op zónne meziek haaje we ós ouch ein bietje ingestèldj.

Nou. Merde!!! Det leep efkes anges. Madame Pravi begós nog braaf mèt Voila De drie volgendje chansons wore ouch nog van du vin, pain en get paturain. Tenminste, det dachte wae oet de tekste te begriepe. Daonao ging ’t daak d’r vanaaf. Gitaargeweld, zwaore beats, strak drumwerk en ein geweldige leechtshow. Ich haoj d’r waal van. Hieël efkes woor ich bang det ’t mierendeil van ’t publiek, minstes net zoeë aod of aojer as ós, in paniek de zaal oet zooj vluchte. Mer niks d’r van. Nemes dae det in ziene kop haoldje. La Pravi graep ederein bie de sträöt.