Al maondje worstel ich mèt ein lestig iets. Ein worsteling in stilte. Anges haaj ich uch de lèste waeke ouch waal via dit medium lastig gevalle mèt mien angere platte gedachtekrónkels. Natuurlik speeltj dit al get langer, mer noe is ’t offisjeel. Ich moog of mót michzellef opnoe gaon oetvinje. Laote we ’t op moge haoje. Det veultj baeter.

Al ruum twieë jaor bön ich op zeuk nao zicht op baeter. As ’t geit óm baeter zicht mót ich ’t doon mèt oetsprake as “kun je zo verder met je leven?”, “je staat er best goed in” en “je moet in alle rust maar eens bedenken wat je met de rest van je leven wil”. Oetvinje dus. Dao geit biej mich de vlag neet väör oet. Mer die vlag hooftj ouch zeker neet nao ’t midde van de stek te zakke.

Van orgine bön ich bookhaojer. Anno 2025 höbbe ze väör die funksie get deurdere name oetgevónje, mer ich bön weer ’s blieve hange. As d’r ein dink is waat bookhaojers neet as ieërste lieëre, den is det oetvinje. Bookhaojers mótte get vinje van oetvinjinge en ‘t wèrk van anger miense. Wèrk det oeteindelik vertaaldj is nao cijfers. Cijfers die aafhankelik van waat ze väörstèlle links of rechs staon. Debet of credit neume ze det. Óm ’t get interessanter te laote klinke vermoed ich. Väör väöl miense is det al snel ein saort Sudoku. Leuker wäördj ’t neet gemaaktj. En ouch zeker neet mieër gemekkelikker!

Bookhaojers hove ’t raad neet oet te vinje. Die hove allein mer vast te stèlle of det proces van oetvinje neet teväöl gekostj haet. En of d’r daonao den nog get geld äöverblieftj, det den winst geneumdj wäördj. Vraog bookhaojers neet nao de hoon en ’t ei. Die gaon dich ech neet vertèlle waat d’r ’t ieërst waas. Behalve asse de kassabunkes bewaardj höbs. Daonao gaon ze tèlle of ’t aantal eier waal pastj biej ’t aantal hoonder desse höbs. Die stèlle vas of se super hoonder höbs, of desse hoonder höbs die mieër eier lègke den welke hoon den ouch oeët d’r väör. Of messjien höbse waal hoonder die stiekem de pil slikke.