Meziekleefhöbber as ich bön, wäördje ’t hoeëg tied det ich ’s werk van die hobbie maakdje. De ieërste wei waas in America, de twieëdje oppe Waog. De derde wei woor d’r ein van XXL formaat. Die haaje ze den ouch mer Megaland geneumdj. Genaote höb ich op alle drie de plaatse. Mèt de naopret as smakelik toetje.

Van de Americaanse wei is väöral ’t optraeje van de Levellers mich biej geblaeve. Ze kóste ’t nog. En wie bizar det d’r dao miense woore, die zich ’t optraeje oet fibberwari 1993 in Eindhoven ouch nog kóste herinnere. Gedeildje nostalgie duit ’t altied good. In de Megawei van Sjaasberg leep ich väör ’t ieërst van mien laeve. Baeter laat den noeët is ein klisjee. Mer in dit geval 100% waor. Eigelik woor d’r zoeëväöl te zeen en te huere, det ich de herhalinge op tillevisie nuedig haaj óm ’t allemaol get te laote bezinke.

Den haaje we ouch nog die Naerse wei oppe Waog. Wie sjiek woor det weer. Probeer dao mer ’s wäörd väör te vinje:

“Doe zits in ein restaurant op eine doordewaekse aovendj. Huers miense aan de taofel achter dich hieëlemaol enthousiast vertèlle aan häör gezelsjap det ze höbbe geholpe op ein festival in Naer. Achter in de haof, gewuen bie emes toes!! 5 toet 600 miense dao!! En geweldige bands!! Volgendj jaor helpe we zeker weer!”

Ich höb mich neet ómgedrèjdj. Ouch niks gezag. ‘t Zónnig blóndj spesjaalbeer smook mich vanaaf det moment waal nog net get baeter. In stilte genaot ich nog efkes nao van 21 juni 2025.

Gr Hans