Laegfietse
’t Liektj mich ónwaarsjienlik det ich de enige bön, dae waal ’s last haet van de aktualtiteit. De waereldse aktualteit. Aangezeen ’t äöver ós haer oetstorte van al dae élenj ein verdeenmodel is van alle saorte media, vèltj d’r ouch nauweliks mieër aan te óntkome. Nauweliks dus. Mer d’r zeen nog waal get achteraafpaedjes. Die dich biejväörbeeld oppe fiets brènge nao plaatse woeë ’t d’r de sjien van haet, det de waereldj ouch door drèjt zónger drökdje, chaos en leid. Op zeuk nao of oppe vlucht väör, kwome we terech op ’t Rundje Limburg.
Ein rundje óm de kèrk is leuk. Mer väöl te kort óm ech op eine angere tekst te kome. Toegegaeve neet alle kilomaeters van ’t Rundje Limburg zeen hosanna. Messjien det däöróm de sjoeën stökke des te mieër opvalle. Zelfs de zadelpien, dae se daag d’r nao nog veuls, levertj dich mieër gooj den slechte herinneringe op. Helptj dich dinke aan lange stökke zandjwaeg, ónvermoede achteraafwaegskes en kilomaeters fietsepaad. Ónttrokke aan de waereld door vergaete bosse. Verre oetzichte. Ver genóg óm gans gelökkig nao niks te kieke.
Zoeë roldje de rajer van miene foetelfiets mich nao plaatse in mien brein woeë ich te weinig kóm. Nao Paulien Cornelisse. Väöl te vreug gestorve. Die werkelik prachtig kós tovere mèt taal. Al fietsendj äöver dae lange fietsepaad door de Maasduinen ging ‘t op zien èllef en dertigste vanzelf van Paulien nao De Slimste Mens. Eine krónkel in mien gedachten leet mich toch weer struukele äöver de aktualiteit:
Wat weet jij van het fietspad langs de Leudalweg?
Gr Hans