Zónger det ich d’r erg in haaj muteerdje det vastelaovesvirus in get anges. Virusse mutere, det weite wae inmiddels allemaol. Ein mutasie woeë ich in dit geval neet drek gelökkig van waerdje. Waal kraeg ich d’r väöl kriebels van. Väöral in de kael. Ouch hiej waas ’t enige resept weer d’r aan toegaeve. En ein duuëske Ibuprofen. 30 jaor gelaeje haaj ich “geine vastelaovendj” waarsjienlik neet äöverlaefdj. Anno 2025 hoof ich “misse” allang neet mieër mèt hoofdlètters te sjrieve.

Ómdet toeval neet mieër besteit kwome mèt ’t weggaon van de kriebels in miene kael weer anger kriebels väör de daag. De väörjaorskriebels. Waeke haaj ich d’r al op ligge loere en oetgeraekendj mèt en väöral nao de vastelaovendj wore ze d’r. Waat eine mazzel det ich, neet toevallig, net noe in Mestreech mós zeen. Óm de paar waeke kieke mien ougartse en ich elkaar dao deep in de ouge. Maete en väöral ouch haope det ’t good blieftj gaon. Dae haop is, neet väör niks, al bèst lang wederzijds. Mer neet geklaagdj dees kieër. Sterker nog, ós gezamelikke konklusie en ’t waer rechtvaardigde eine kleine ómwaeg nao ein sjoeën stökske Zuid Limburg.

Inmiddels weit ich waal woeë ich mót zeen. Weg van de massa óm de spanning van zón contròle ein bietje in stilte d’roet te loupe. Of d’roet te laote loupe. Die stilte waerdj gek genóg waal ’s op ein plezerige meneer óngerbraoke. Door ein gesprek mèt eine volslage vraemdje. Dae ouch zoeë zien raejene zal höbbe óm juust op det moment op zón plaats te zeen. Waat volgtj is ein prettig gesprek van ’n menuut of vief. Meistal äöver woeë we vanaaf kome en wieë sjoeën ós Limburg is. Óm daonao weer, eder mèt eige gedachte, op paad te gaon. Mien eindbestumming dees kieër ein terras det eigelik mieër eine haof is. Mèt ein óntiegelik hoeëg gelöksgehalte per veerkantje maeter. Óm ’t väörjaor te vere.