Wie op ein van de lètste Waerse Maondjige bie ein snelle ròndjvraog nemes kòs zègke wannieër dit, inmiddels Naers vastelaovestopfestijn, väör ‘t ieërst waas gehaoje, gónge bie get vastelaovesfanate alle alarmbelle aaf.
Aoj rakels inne optocht van 1984
Oos Kwiebusriek haet zoë ein rieke historie – dit jaar is ‘t 150 jaor gelaeje det de Sociëteit de Kweibussewäördje opgerichtj – die moog neet verlaore gaon. Hoeëgtied det we de gesjiedenis in wäörd en beeldje gaonvastlègke.
Zònger dao in eine breije krink aandach väör te vraoge is d’r al hieël väöl verzameldj. Unieke fotoos, bezunjer dokumente, sjoeën aoj sjlagers, opmerkelikke “weetjes” zeen al in ‘n digitaal archief gezatte. Mer wae zeen d’r nog lang neet.
Op basis van waat wae noe al höbbe gekraege en bie-ein gebrach kènne wae allein met konkludere det t’r nog väöl mieër ònger de miense mòt zeen.
In aoj kes, op knoetsj vólle zolders, in noeëts opgeruumdje laje in Naer ligke zeker nog aoj foto-albums, sigarekisjes mèt van die gekarteldje plaetjes oet de 50-er en 60-er jaore en fotoos van die beroepsfotogravedie vreuger nao optochte en aod-wieverballe häör beeldje in de winkel van Joep van Sjoe-Koeëb of Thei van Simons te koup aanbaoje.
Leef Kwiebusse, gaotj estebleef ein van dees daag – want de vastelaovendj in Naer laeft wie nog nie – op zeuk nao materiaal väör òs. Waat vinje buurte, vrindjeklubs, einzelgengers en anger vaselaovesgekke nog van optochte, vastelaovesbals of anger bezunjer gebäörtenisse oet de rieke vastelaovesgesjiedenis in Naer? Dink ouch ane jeugdvastelaovendj mèt al 63! jeugdvorste. Stèl eur materiaal noe veilig en gaef of lieën et efkes aan òs. De Naerse vastelaovendj geit noeëts verlaore, laote wae ouch de Kwiebussehistorie väörieëwig vastlègke.
En noe wiltj gae natuurlijk nog nog weite waem wae zeen?
