Käöning Wintjer
D’r zeen van die daag, den duis se dien rolloeke aope en haop se wakker te wäöre in eine witte waereldj. Väör de dudelikheid, ich bedoel in dit geval ein diek pak sjnieë boete!! De kans dao op is zoeë langzamerhandj steeds kleiner aan ’t wäöre. ”Dreaming of a white christmas” geit steeds mieër äöver dreaming den äöver christmas, mer druime moog altied. Zeker ouch in 2025!
Käöning Wintjer is zón lid van ós Vorstenhoes woeë ich neet good van weit waat ich dao mèt aan mót. Hae is d’r mer aaf en toe. As hae serieus werk meuktj van zien aanwezigheid, väöl sjnieë en waeke kaod, den vinj ich det prima. Ein paar waeke kaoj mèt ein fijn zón in eine strakblauwe hemel slaon ich noeët aaf. Den höb ouch ich ein bietje ’t geveul ‘ne kieër in Oeësteriek te zeen gewaes in de wintjer.
Helaas kumptj Käöning Wintjer prónt wie zien naef oet Den Haag mer aaf en toe. Meistal geit det gepaardj mèt eine houp trammelant en väöl bombarie en oeteindelik höbse d’r mieër las den plezeer van. We kènne d’r steeds minder van op aan, dae Käöning Wintjer. De lèste jaore wäöre we aafgesjeeptj mèt ein of angere verre naef van ‘m. Dae hultj zich väöral in nevelen en liektj ’t leegt neet te kènne verdrage. Dök zeen ich ‘smörres de bui al hange väör de res van de daag. Mèt mieër haop den get anges kiek ich óm ’t oor op miene waer-app, mer det meuktj ’t d’r neet baeter op.
Mieër vertroew ich in dees daag op Vorst Kwiebus en zien gevolg. Sterker nog, ich bön bliej det ze d’r weer zeen. Die zörge väör get tamtasie en kläör in dörp en brènge ‘t hoeëgnuedige laeve in de brouwerie.
Väöl miense dinke desse altied in ’t oug van de vastelaovesstorm mós staon óm d’r optimaal van te kènne genete. Noe höb ich wal get mèt ouge, mer in dit geval hoof ich neet mieër persé in ‘t oug van dae storm te staon. Aan de randj van dae storm, de boetekantj zègk mer, dao wèjt ’t mich óngertösse ouch hel genóg. Hel genóg óm de frisse vastelaoveswindj door die paar haor te veule wèje, de kop laeg te make en weer vol te make mèt frisse mood en noew ideeje. Ein paar waeke Vorstverlet, óm 2025 good te beginne. Messjien waal get langer as ein paar waeke. We zeen ’t waal. Niks zoeë wisselvallig as ’t waer.
Gr Hans
