Jeugdsentiment
Mèt ’t klumme van de jaore en mien nogal verangerdje daagindeiling de lèste tied is d’r in miene intern geheuge väöl plaats äöver väör jeugdsentiment. Oetgaondje van ein negatieve interpretatie klinktj det as “vreuger woor alles baeter”. Bekiek se ’t van de positieve kantj, den vinj ich ’t mieër ’t aafspele van ein Best Of cassettebendje.
Herinneringe kome trök in versjillendje vorme. Smake, kläöre, geluide of de räök van iets. Den dink ich aan wie ’t raok in de käöke as mam flaai gebakke haaj. Of wie ’t raok in de wintjer in de sjeur bie ein dampendje aoliekachel as de paor waerdje sjoeëngemaakt.
Herinneringe doon ’t nog baeter asse ze kèns deile. Op verjäördage mèt vrunj doon aoj verhaole ’t altied good. Wil se ’t echt gezellig kriege, den kèn se ’t sjtraevele baeter laote en dich same väör de zoeëväölste kieër besjäöre äöver belaefenisse woeëvan se haops, det dien kinjer dich die neet naodoon. Ich put efkes oet eige repertoire, wiekendjes weg, konserte, drankgerelateerde incidente mèt pliesiewages, burosteul, de Maas, valpartieje mèt en zónger de fiets, naobroelofte en ganse sjape mèt films die miense de mörge d’rnao kwiet woore. En väöral ouch de gevolge van zón incidente daags d’r nao op ’t voetbalveld, tiejes ’t kanoeën of op ongeplandje naobesjouwinge woore den de slagroom op de taart die noe jeugdsentiment hètj.
De allermeiste herinneringe van mich zeen gekoppeldj aan meziek. Waarsjienlik neet allein ómdet ich eine enorme leefhöbber bön, mer mieër nog ómdet ich die gooje herinnering mèt hieël väöl miense deil. Det zal ouch de raeje zeen weróm cover-bands ’t zoeë good doon. In eine zaal of ein tent steise mèt ein ganse generasie, Abba of Queen her te belaeve. Op ein fieësje van emes dae 50 waerdj of 25 jaor getrouwdj is, is daezellefdje meziek messjien waal óngemerktj dök de verbinjende factor is. As emes mich 30 jaor gelaeje haaj gezag det ich in 2024 Janse Bagge en AC/DC nog ’s live zooj zeen, haaj ich ‘m messjien waal gegluifdj, ’t in eder geval gehaoptj, mer mich as ieërste aafgevraogdj wie d’r in godsnaam biej die vraog kwoom. Pas asse aojer bös, vreug se dich zón dinge aaf.
Zeen wae den noe al zón aoj zek, belaege en totaal neet van deze tied? Det vèltj volges mich waal mèt. Det dink ich den mer as wae Atemlos durch die Nacht op hoes aan sjravele ónger ’t leecht van 1000 Sterre, väör efkes weer de Kampioene van de Nach zeen en einmaol toes de Engelbewaarder bedanke väör weer eine geweldige aovendj.
Gr Hans
