Hittegolf
Zónger d’r drek äöver te wille klage kèn wäöre vastgestèldj det ’t behuerlik werm is dit weekend. Heit zellefs. En ’t is det de media ’t te drök höbbe mèt die anger hittegolf. Anges waas ‘t waer van dit weekend echt ein “trending topic” gewaes. Ein anger hittegolf dus. Die inmiddels flink get miense nao de kop gestaege is. Wie zieër ich ouch mien bèst doon, wie väörzichtig ich de radio of tillevisie ouch aanzèt of wie bedachtzaam ich ouch äöver ‘t Gezichtegram surf, d’r is gein óntkome aan.
Wie woestijnzandj kruuptj ’t sjtaof van ’t gekissebis door de dauerluftung, ónger däöre door, door de breevebös en zelfs door de geïsoleerdje spouw ’t hoes bènne. Óm dao vervolges as taoter neer te slaon. ’T kumptj ouch ech van alle kenj. Van rechts, van links of gewuen recht door de midde. Örges is sjtaof toet naodinke verwaore toet modder. Waarsjienlik ómdet ’t same vinje van ein oplossing ein te groeëte oetdaging is. Bienao zeker ómdet emes anges de sjöldj gaeve altied stökke gemekkeliker is.
Terechte zörg óm de gezóndjheidszorg as ich zeen wie snel gezóndj verstandj liektj oet te sterve. Terechte zörg óm ’t klimaat as ich zeen wie versneld de gemoedere verhit rake. Terechte zörg óm taalóngerwies as ich de waordkeus in reaksies laes die ich links en rechts taegekoom. Terechte zörg óm stikstof ómdet det ós op versjillendje menere verstiktj. Zoeë kènne we nog waal efkes doorgaon. En den mótte we daobiej ouch nog de probleme van de rest van de waereld oplosse.
De probleme zeen d’r. Dao kènne we neet óm haer. De cultuur van klage en moddergoeëje die inmiddels is óntstaon, is ein verdeenmodel gewaore. Meuktj ’t allein nog mer lestiger. Aolie op ’t veur sjmiete liektj mich daobiej in eder ouch hieël erg slecht väör ós milieu. Blusse is baeter den aanblaoze.
Äöver blusse gespraoke. Wie fijn is ’t óm juust die klaagcultuur te óntvluchte en op zeuk te gaon nao get baeters. Waog dich beväörbeeldj In ein wei mèt gooje meziek, geliekgestumdje miense en ein lekker kaod pilske. Of op ein väörtreffelik terras mèt gooj Kompenie en geweldig oetzicht op det waat ein geweldig dörp kèn zeen. Den vèltj die hèts oeteindelik ouch wal mèt. Lang laeve ’t Plezier van Hier.
Gr Hans
