Henk is enne lollige vent.
De titel van dit leedje kèntj gae óngetwiefeldj. ‘T leedje steit op de ieërste volwaardige CD van Rowwen Hèze. Oetgebracht in de tied det fieësttente en kefees äöverlepe as Rowwen Hèze kwoom. En wie ze ouch boete de provinsie voot aan de gróndj kraege. D’r waerdje mieër mèt beer gesmaete den in de slechtste toeswedstrijde van Ajax noe. Optraejes van Rowwen Hèze stónge toen väöral väör fieëst, väöl beer drinke. En dök zeiknaat van ’t róndjvleegendj beer nao hoes gaon.
Wèróm oetgeraekendj noe deze titel mich inveel? Gein idee. Uiteraard höb ich de CD ónmiddellijk effe in de speler geduutj en eine trip down to memory lane gemaaktj. Verrek, ich zooj plat sjrieve, “gooj herinneringe opgehaoldj.” De meziek stèktj aan en de zin in ein fieësje is noeët ver weg. Mer ouch hiej weer de tekste die blieve hange. Gein idee of Jack Poels ein volle tent mèt fieëstendje miense väör ouge haaj wie hae zien tekste väör Boem sjraef. De manne van Rowwen Hèze mótte in ’t begin ouch dök höbbe gedacht van “waat äöverkumptj ós noe?” Ich dink zeker te weite det Henny Vrienten in ziene tied biej Doe Maar ouch neet haaj väörzeen det hordes kinjer van 13 jaor oetzinnig “je loopt je l#@$l achterna” zooje gaon mètsjrieëwe.
De meziek en de tekste van toen zeen nog lang neet äöver de datum. En zeen terecht dus ouch nog dök te huere. Nao dees CD mós ’t allemaol get professjoneeler. Begriepelik asse as bend op dees meneer wils blieve bestaon. Mer väör mien geveul zörgdje die belange d’r väör det ’t waal get doordachter mós. Woeëmèt ich neet wil zègge det ’t slechter woor, zeker weite van neet! De inspirasie väör Boem liektj mich gans oet de dörpskroeg te kome. Ein dörpskroeg die d’r anno 2024 op väöl plaatse neet mieër is, mèt dörpsfigure van ’t saort det mèt oetsterve bedreigdj waerdj.
Ich höb gein idee of Henk nog steeds de lollige vent is dae d’r in 1991 woor. Wie ‘t verder mèt ‘m is gegaon. Aafgaondj op ziene laefsjtiel verwach ich det Henk eder halfjaor biej de hoesarts zitj óm väör de 26e kieër te huere det ‘t noe toch echt tied waerdj óm te mindere. Persuenlijk dink ich det eder dörp ziene eige Henk haet. Sterker nog, det ederein eine eige Henk haet. Eedereen zooj eigenlik van tied toet tied ouch zelf effe Henk mótte zeen. Ich zwaer uch det ‘t aantal burn-outs mèt 50% zooj aafneme as ederein op ziene tied effe Henk woor of eine Henk haaj óm mèt op paad te gaon. Toch höb ich vanoet de hook van de moderne psychologie nog noeët emes huere zègge “doe mós de volgende twieë maondj mer ‘s effe Henk zeen”. Of “messjien is ‘t baeter desse dit weekend mèt Henk op stap geis.” Op ziene tied effe Henk zeen of mèt Henk zeen. Óm te relativere en te bewieze det de soep gaaroet neet altied te heit gegaete hoof te waere. De zake efkes mèt ein körrelke zaot te neme of as det nuedig is ein half pötje.
Gr Hans
