Hèkke
Väör de miense die van zekerheidjes haoje, kèn nao bienao 1/13e deil van 2025 de vlag al oet. Mèt zekerheid kènne wae zègge det d’r nog altied zat aan de handj is det ’t klage en sjtraevele waerd is. Keus zat. In alle saorte en maote. Van waerelds, nao nasjonaal en eindigendj väör de väördäör. Dees waek ónger angere mèt dank aan de wilj verkes. In Gäöl mótte hèkke gezatte wäöre óm miense en verkes gesjeije te haoje. Bliekbaar zeen d’r momente det eine miens en ein wildj verke neet same door ein däör of ein bos kènne. Väörig jaor haaje we dees diskussie ouch al äöver eine Utrechtse wolf.
Hiej sjrik ich neet van. Woeë ich waal van sjrik is van miense die dinke det in ein landj woeë óm edere veerkantje maeter geruzietj waerdj, plaats is väör nog mieër ambisies. Mieër plaats väör wilj verkes, wolve, bevers en weit ich neet waat allemaol. Van mich moog ‘t, mer we höbbe ouch nog 18.044.282 miense die allemaol op zien minst ein daak baove de kop wille höbbe.
Hieël dierónvruntjelik. Ich weit ‘t. Mer ouch hiej is de diskussie weer erg selektief. Persuenlik höb ich gaaroet niks taege de geneumdje bieëste. Get lestiger vinj ich de noewe eksotiese diersaorte die Nederlandj äöverspeule. De Cobra 6 en Cobra 8 in dit geval. Zörge väör eine houp herrie en ónröst en höbbe dök ouch nog ein, zoeë wie ze det zègge, “kort lontje”. Dao gaon we nog waal efkes plezeer van höbbe. Ich dink det ich weit in welke asfaltjungle de volgendje hèkke kome te staon.
Gr Hans
