Hampeleman
Mien ónhenjigheid leverdje mich thoes en in de femilie al vreug de stempel “Hampeleman” op. Volges mich nog väördet ich in Naer van sjoeël aaf woor. De vervolgstap nao ’t Algemeen Voortgezet Onderwijs woor den ouch mien ónvermijdelikke lot. Dao doordje ’t nog waal efkes väördet ich ein sjoeëlvak taegekwoom, woeëmèt ich neet steeds van de ein in de anger konflikt-situasie terecht kwoom. Handelswetenschappen en Economie woor mien reddingsboei.
Achteraaf logies. Ekonomies dinkendj as ich woor, mót ich al vreug in de gate höbbe gehadj det ich neet teväöl tied en enerzjie mós staeke in zake woeë ich niks van kós of niks aan vónj. Ouch höb ich noeët gegluifdj in de metamorfose van Hampeleman nao Kluskampioen. (Waat ein geweldig programma format väör John de Mol trouwes!!). Piele mèt getalle en dao ’n verhaol aanhange. Det woor mien dink. Trökdinkendj haaj ich mèt ’t oug op de klustechniese zelfredzaamheid waal get henjiger wille en mótte zeen en d’r mieër tied in mótte staeke.
Mèt ’t bouwe van de vastelaoveswage woor mien rol biejväörbeeld erg beperkt. Opgaeve, nummer aafhaole, bietje sikkretaris spele, teks aan de ziejkantj van de wage op spelling kontrolere, get stómme kal doon en väör de res väöral äöveral van aafblieve. Tjaa, zèk noe zelf, mèt zón enorme akkubaor, eine workmate of ein flinke flexzaeg kumse op zón momente toch net get baeter väör de daag. Ónnuedig óm te zègke det ich väör de meiste klusse in hoes väöral mien kommunikatieve vaardighede nuedig höb.
Dit is waal ein erg lange inleiding. Woeë ich nao toe wil, is det ich as Hampeleman allang neet mieër allein staon. ’T CBS haet nog noeët óngerzóch wieväöl % van de werkzame bevolking van Nederlandj ’t predikaat Hampeleman dreugtj. Stiekem vermoed ich det det kumptj, ómdet biej ’t CBS ouch väöl Hampelemen zitte. Die gaeve zichzellef neet gaer bloeët. Vanoet mien werk mós ich d’r waal ’s belle, dao biej ‘t CBS. Ge mót mich gluive as ich zègk det ich nog mer zelde zoeëväöl telefonies gehampel achterein höb gehuerdj. Van sommige miense dao, vermoede ich det ze nog waal ein verborge talent haaje. Asse de ganse daag miense taege de haor in mós strieke is d’r bienao zeker eine gooje kapper aan dich verlaore gegaon.
Mer óngertösse zitte we waal mèt ein gebrek aan miense die d’r väör höbbe gekaoze óm geine hampeleman te zeen. Miense die get kènne mèt de henj. En d’r den ouch nog get mèt wille doon. Raejene zat óm dit te verklaore. Jaorelange óngerwaardering van miense die mieër mèt de henj as mèt de móndj werke. De keuze väör nog goodkoupere arbeidskrachte oet “Elders”. ’T VMBO jaorelang gebroeke as bewaarsjoeël en zoeë ein komplete generasie de kans óntneme óm ein good vak te lieëre. Bezunige in plaats van investere op óngerwies. D’r zulle nog waal tig raejene zeen weróm ’t allemaol neet zoeë good geloupe is.
Tja, as diene blik altied allein mer nao baove gericht is en den bedoel ich richting HBO en universiteit, den is de kans groeët desse neet in de gate höbs det detgene waat d’r ónger steit, de fundering, det woeë alles op steuntj, langzaam wegslietj.
Gr Hans
