Waat den asse te make höbs mèt eine aoje Meerval dae ’t allemaol neet mieër zoeë good zuut? Drek mós ich trökdinke aan de kieëre det we lang gelaeje op ein lóchtbedje van 2 maeter äöver de Maas nao ’t Beesels gaat ginge. Bein in ’t water en den zón bieëst ónger dich! Ich veul ein noew versie van Jaws aankome. “Catfish.” “Katkarper” of “Tijgervès” make we d’r van. Det klinkt vertroewder. De gebaorte van eine noewe Limburgse Maasthriller.

Meerval is ein vèssaort die oorspronkelik neet in de Maas väörkumptj. Eine oetheemse roofvès. Det is ‘t. Kumptj hiej de biodiversiteit in ’t water get verzouwe. Zörgtj d’r väör, det väöl anger vèssaorte en aendje ’t moeilik höbbe óm te äöverlaeve.

Ónwillekeurig mós ich hiejdoor dinke aan de lokale middestandj. ’t Moment det Octopus Appie en väöral zien priesvechtende naefkes van Duitse orgine ’t Zuid Nederlandse winkellandsjap bènne zeen gezjwómme. Vanaaf toen haaje de kleinere lokale vèsse meute de kop baove water te haoje. Mèt ein paar van häör erm laote de groeëtwinkeloctopusse de kleine konkurrent langzaam stikke. Mèt die anger erm haole ze alle klantje bènne mèt de boeëdsjap det ze op de kleintjes lètte. Ich bön d’r nog neet gans oet, waat det oplètte presies inhèltj.

Kleine middestanders höbbe in kleine kerne väöl mieër den allein ein verkoupfunksie. Sosjaal gezeen, zeen ze minstes net zoeë belangriek. As plaats woeë miense elkaar treffe. Väör vereniginge die róndjgaon väör sponsoring van häör evenement of aksies. Den waerdj de däör dao nog waal plat geloupe. Mede door de kleine middestandj te eliminere, waerdj ’t sosjale laeve in de kleine kerne óntregeltj. En nog neet zón bietje.