Ich kèn mich zoeë väörstèlle det de gemèndje al ’s väörzichtig biej de Leistert haet geïnformeerdj. Of die eventueel alle boekinge zooje wille annulere volgendje waek väör eine hieël belangrieke V.I.P. mèt aanhang? De terreinkemissie zal zich al ‘s höbbe aafgevraogdj of de sjöttewei waal Beast-bestendig is? En wie zeen die sjeetbuim d’roet as Trump ’t äöpeningssjot haet gelostj? Det zeen allemaol zake woeë zich noe gelökkig nemes mieër drök over hooftj te make.

Noe blieftj ’t käöninklik gehalte zónger sjötteblood beperkt toet de Koning der Nederlanden. Knap det oze börgemeister de gooje man nao Heytse haet weite te haole. Ein ónvermoed stökske daadkracht zelfs. Waarsjienliek ekstra werk väör de organizasie, mer as alles good geit, achteraaf ein kers op de taart.

Natuurlik höbbe wae in Naer vanaaf 1948 ein dingske mèt Heytse as ’t óm ’t O.L.S. geit. Mer det wiltj neet zègge, det we neet mèt zien alle moge haope det ’t ein geweldig O.L.S. wäördj. Zeker väör alle miense die same aan Um zeen gegaon. Väör de sjötterswaereldj die edere positieve impuls kèn gebroeke. En toch ouch väör de gemèndje Leudal die väör de verangering waal ’s positief in ’t noets moog kome.

Zitte we allein nog mèt oze Käöning Willem. Ein bietje bezörgdj väör eine cultuursjok moge we toch waal zeen de volgendje waek. Van Trump nao Schmalschläger. Det blieftj one small step for man, one giant leap for mankind.

Gr Hans