Mètdoon aan gemèndjeraodsverkeezinge is allewiel gein ieërebaan mieër. Hulde dus väör de miense die mèt de bèste bedoelinge dao waal häöre tied en enerzjie instaeke. Det miense ’t den neet mèt dich èns zeen, is ein vervaelendj bie-versjiensel. Vreuger haat se dao den diskussies äöver. Dök in de kroeg en as se ’t ech te bóntj haats gemaaktj, oppe bóntje aovendj. Allewiel kèn ich mich väörstèlle, desse as kandidaat raodslid nog neet mieër op dien beeldsjerm dörfs te kieke. Oet vrees det ein of angere emes of nemes dich de meist akelige dinge toewinstj.

Mer good. De gemèndjeraodsverkeezinge. Väör ’t ieërst in hieël erg lang höb ich de fietsbrök die d’r oeët of noeët mót gaon kome tösse Böggeme en Lieëwe gemistj in de berichte. Toch altied ein leuk óngerwerp óm op diene lokale politieke agenda te zètte. Want, zón fietsbrök is serieus henjig óm snel en veilig oppe fiets in de stad te kome. Want, zón plan is daonao mekkelik door te sjuuve ómdet dao ieërst de haolbaarheid in hieël väöl versjillendje fases van mótte waere óngerzoch. Want, zón plan is daonao daonao mekkelik aaf te sjeete ómdet bezjwaore väör ’t oprape ligke. Kortóm ein geweldig plan woeë se ouch weer geweldig gemekkelik vanaaf kèns.

Bènne de gemèndje Leudal zal die fietsbrök zoeëwiezoeë gein prioriteit mieër höbbe. Want op Leudalplein 1 laeftj ’t principe det alle waeg nao Heytse mótte leide. En dus zeker neet nao Lieëwe. Dae fietsepaad langs de Leudalwaeg liktj al ein tiedje väör te gare in de riepingskas van ’t gemèndjehoes. Good wèrk haet tied nuuëdig. Ónthaoste steit dao baove äöverhaoste. Regels baove realiteit. Check-Double Check waerdj mèt leefdje verlingtj mèt ekstern advies.