Ergernisse oppe waeg
Aafgeloupe waek loos ich inne gezèt det wae ein landj zónger lontje zeen gewaore. Det kèn väör nemes ein verrassing zeen. Mèt alle óntploffinge ’t ganse jaor en ‘t ganse landj door, kèn ’t neet anges of zelfs ’t veurwerk wäördj inmiddels zoeë good as lóntjloos verkoch. Mer ja, waat duise d’r aan? Alle miense verplichte óm sjoon mèt staole naaze te drage? Zoeëdet in eder geval neet ederein te snel oppe tieëne getraptj is?
Wae ergere ós dus kepot. Äöver eigelik bienao alles. Verkieërs-ergernisse skore in eder geval erg hoeëg. Nog steeds. Ouch ich mót sjöldj bekènne. Tis neet det ich in de auto veranger in ein óngeleid projektiel, mer ich erger mich juust aan al die óngeleide projektiele oppe waeg. Mèt 130 per oor äöver de Heljesewaeg. Rechs inhaole oppe autowaeg en den efkes vakkundig väörlangs snieje. In de file bènne eine kilomaeter van de rechtse riejstrook via de middebaan nao links en den weer gans trök väör drie plaatse winst. Op zón moment kèn ich ’t bèste ein röstgaevendj meziekse aanzètte en get wegdruime. Toch zaet get mich det ouch det neet heniig is in de file.
Mien groeëtse ergernis op de waeg, zeen baere oppe waeg. Neet ómdet ich in Canada of Siberië eine roadtrip höb gemaaktj en d’r vanaaf dae tied nachtmerries van höb. En nae, ouch neet de angst óm op Brummendj bepaoldje miense taege te kome. In taegendeil, dao zooj ich nog ieërder stoppe óm gezellig efkes te buurte.
’T Is mieër det waat mich äöverkumptj väördet ich überhaupt aan ein verre of avontuurlikke trip begin. Väör mich is ’t al snel ver en den ouch drek avontuurlik. Det zal ein bietje in mien DNA zitte. As gebaore bookhaojer bön ich eine man van “Reserves en Voorzieningen”. Altied raekening haoje mèt taegevallers die d’r hieël messjien kènne kome. Tja, den verlang se al snel nao de veiligheid van dien eige Comfort City.
Aardbevinge, äöverstruiminge, zwarte zaoterdigge, black Fridays. Ge kèntj ze allemaol waal, de rampe die door gein inkele verzekering gedèktj wäöre. Op fietsvekansie door Frankriek de derailleur in ’t raad fietse. En vervolges nog 40 km mótte loupe toet de volgendje fietsemaeker mèt ein achterraad det moorvast zitj. Örges midde op de Luneburger Hei de kètting doormidde trappe terwiel diene tillefoon bènne 30 km gein bereik haet. Neet ederein is in staot óm mèt ein naegelsjierke en de gesp van eine bóksereem den efkes det probleem te fikse. Of óngerwaeges in Ierlandj geconfronteerdj waere mèt doezendje spookriejers ómdet nemes zich dao aan de verkieërsregels hèltj. Det saort dinge.
Noe höb ich mich laote vertèlle det dit alles waerdj veroorzaaktj doordet ich te väöl naodink. Oeët goof miene accountant mich ’t gouden advies: “biej twiefel neet äöverstaeke”. Ein gooj waarsjuwing väör mich persuenlik. As ich nog mieër gaon twiefele en naodinke kóm ich nog neet èns mieër aan de angere kantj van de waeg.
Gr Hans
