Door angere ouge gezeen
Wie dök huerse miense neet zègke desse zake ’s door angere ouge mós bekieke? Nou, det zooj ich waal wille. Dink ich. Mer den steisse väör ein lastige keus. Welke ouge mótte det den zeen? In mien geval zal nemes mich kwaolik neme, det ich baetere ouge den det ich noe höb as ieërste eis in mien pakket van winse zal opneme. Of baeter den ouch ech baeter is? Väöralsnog bön ich al hieël kontent óm door anger hoornvlieze te moge kieke.
Vanwaege de praktiese ónmäögelikheid van “door anger ouge gezeen” waerdj ouch dök de metafoor “door eine angere bril kieke” gebroektj. Sinds dees waek weit ich det die metafore nötte dinge zeen. In verkeezingstied waere daodoor beloftes van politici neet good begraepe. In plaats van desse dinks det dao eine wieze sprèktj is ’t dök väöl mieër “biej wieze van spraeke”.
Afeng. “Door eine angere bril kieke” dus. Des nog geine kattepis. Ich weit neet wie ‘t uch vergeit, mer biej de ougedokter of opticien mósse den óm te beginne door 1001 brilleglaze kieke. “Vinjse dit den baeter of deze?”
Den wètse ’t oppe door ouch neet mieër. En dien ouge waarsjienlik ouch neet. Oeteindelik zaese den mer get óm d’r eine kómaaf aan te make. Daonao mót ’t nao de brillewinkel. Dao neem ich allewiel emes väör mèt. De drök van die beslissing kèn ich nao al die glaze allang neet mieër aan. Väör ein montuur mósse de zake namelik ouch nog ‘s “van de angere kantj” bekieke.
Den toch mer die anger ouge. In principe kiek ich al deils door anger ouge. Waat ich dus zeen, is al gelieëndj zicht. Mós ich den toch ech anger ouge keeze? Den waerdj det óngetwiefeldj ein kompleks vraogstök. De keuze is reuze. In mien pakket van eisen zooj ich in eder geval get mieër bewónjering en verwónjering wille toevoege aan miene óngetwiefeldj belaege kiek op miense, mien ómgaeving en de waereldj. Óm sommige miense baeter te begriepe zooj ich häör zicht waal väör effe wille lieëne.
Óm good te kènne zeen, höbse trouwes neet allein ouge nuedig. Dao bön ich achter gekome in miene wazige waereld van 2023. Juust toen, bön ich gans anges taege väöl dinge aan gaon kieke. En neet persé slechter.
Gr Hans