De Wraak van Sleen
In oktoeëber höbbe we nog get kilomaeters Pieterpaad weggefietstj mèt ós fietskwintet. Daomèt höbbe we ós drek verlostj van de stempel “good-waer-fietsers”. Aaf en toe sjuule, raegenjeskes aan en doorfietse woor trouwes de enige keus die we haaje, wie we einmaol óngerwaeg woore. Raegenbókse neet. Zeker neet. Ich gluif det wae die neet mieër aangehadj höbbe vanaaf oze sjoeëltied. Die óndinge. Waat ein gedoons waas det, óm die aan te trèkke. En haat’se zón dink den aan, den sjeidje ’t drek oet mèt raegene. Of doe haats op sjoeël zoeëväöl wèrk mèt oetdoon, desse te laat en zeiknaat van de zjweit in de les kwooms.
Wie zoeë dök veel ’t achteraaf saoves allemaol waal mèt. Biej Puik in Ommen zoote we twieë aovendje enorm Puik. Op de ein of angere meneer sjmeuktj ’t aete nao zónne daag boete in de naojaorslóch altied baeter. Doe zits net get lekkerder en wermer en doe höbs diene allerbèste dorst. De paar kilomaeters daonao door ‘t naat en duuster nao ós slaopplaats moke de wachtendje werme doesj allein nog mer lekkerder.
Wae fietsdje van Holten nao Schoonloo. Doordet ’t OV in dae hook van ’t landj toch get anges (weinig en erg wied óm) löptj den ’t Pieterpaad, moogdje we de route döbbel fietse. Haer en trök. Neet ech henjig asse zoeë snel mäögelik nao Pieterburen wils. De Sallandse Heuvelrök, de Lemelerberg, de stökke langs de Vecht en langs ’t Oranjekanaal woore de kilomaeters mieër den waerd. Leukste tössestop woor de Bouwkieët Bookwinkel väör ’t gooje doel in Stegeren biej de Vecht. Neet te misse en ónmäögelik äöver te slaon. Dök fietsdje we ónger ein daak van goudgaele blajer. Op eine half drueg/half nate óngergróndj van gevalle blajer. Op zich oktoeëbers dus.
Woor ’t den allein mer geweldig? Uiteraard neet. D’r woore flinke stökke kaal, plat en taegewindj. De Boerderiejewaeg is äöveral zègk ich altied mer. In Sleen (biej Emmen) mook ich de enorme vergissing hel op te zègke det “ich hiej nog neet …… gevónje zooj wille waere.” Waarsjienlik ónger invloed van 15 kilomaeter taegewindj. En mede gebaseerdj op de ervaringe van wie we hiej oeët lepe, twieë jaor ieërder. Mer ich haaj baeter mótte weite mèt mien te snelle aordeil.
Oppe trökwaeg raeje wae/ich oze ieërste platte bandj. In Sleen uiteraard. As of ich d’r zellef óm gevraogdj haaj. Biej de fietsemaker väör de däör. Dae net 30 seconde toe waas. Of 35. Dae weigerdje ós te kome helpe. Hae zoot waarsjienlik net aan zien opgewermdje broen boeëne. Gelökkig moogdje we zien gezón gebroeke óm de bandj te plekke. En óm vanoet gedwónge stilstandj te zeen det Sleen waal mèt veel. Eigelik bèst leuk waas. Soms höbse bliekbaar get hulp van baove nuedig óm ’t allemaol good te zeen.
Gr Hans