Trots zeen we óngetwiefeldj allemaol op ziene tied op ós eige identiteit. Tied óm d’r biej stil te staon? Det sjientj get lestiger te zeen. Vèltj ouch neet mèt. Mèt dank aan al die tradisies, die we de lèste decennia d’r biej höbbe gekraege.

Biej LEI dink ich as ieërste aan hieël väöl Lei’s die ich kèn of gekèndj höb. Allemaol kaerels mèt ’t hert oppe gooj plaats. Lei waas sjeidsrechter, voetballer, keeper en leider tegeliek biej de voetbalklub. Mieër den eine Lei lepe en loupe zich biej de vastelaovesvereniging de bein ónger de vot oet. Lei handjbaldje, zóng en zingtj. Lei regeldje alles biej de bejaarde. Lei raej beer róndj. Ein sjötterie zónger Lei? Det sjuut neet op. Lei kaldje op de radio ’t O.L.S. weer oppe kaart. Lei neemtj ouch noe nog oze jóngste aaf en toe op sleiptouw. Lei zitj neet stil. Hae is ónmisbaar in ’t verenigingslaeve. En jao, Lei löptj ouch gaer nao de tap toe. Det haaj Jack Poels good gezeen.

De daag van LEI is trouwes internasjonaler den ich oeët haaj kènne dinke. Op Hawai waerdj al vanaaf 1 mei 1929 LEI-day geveerdj. Ich mót d’r nao raoje, mer ich vermoed det dit oeët is begós ónger de bezielendje LEIding van eine Limburgse jóng. Dae waarsjienlik as pater of missionaris dae kantj op is gestuurdj.