Blind Date mèt 2025
Wie ich väörig jaor väör langere tied toes zoot, haaj ich geregeldj eine Blind Date. Väördet gae geliek gaotj appe mèt eur kènnisse, de gezèt en RTL Boulevard, mien vrouw en kinjer wiste van mien “Dates” aaf. Dök móste ze mich d’r zelfs haer brènge. Aafspräökske mèt miense die ich nog neet ieërder haaj gezeen, mer die ich ouch tiejes die aafspraoke neet kós zeen.
’T leuke van die Blind Dates woor, det ich de miense taegenäöver mich mós beaordeile op basis van mien gehuer. Veule höb ich veiligheidshalve mer achterwaege gelaote. De kläör van de kleijer kós ich nog waal óngersjeije en get van ein profiel. Mer det woor ’t den ouch waal. Op zón meneer “kiek se” dus gans anges taege miense aan. Dien ieërste aordeil is ein saort van puzzel dae se zelf in elkaar moogs gaon lègge. Ómdet se minder stökskes van dae puzzel höbs, is dien ieërste aordeil ein stök väörzichtiger. Oet eige ervaring kèn ich dus noe mèt 100% zekerheid zègge, det eine ieërste indrök dök ‘t meist gebaseerdj is op det waat we zeen. Ich hoof uch neet te vertèlle wieväöl miense wae dao al tekort mèt höbbe gedaon. Of enorm höbbe äöversjat. Achteraaf höb ich mich trouwes dök de vraog gestèldj of ich eigelik altied ein aordeil äöver iets of emes mót höbbe?
Steeds mieër is oze toekomst eigelik ouch eine Blind Date. De zekerhede die we jaorelang dachte te höbbe, zeen d’r neet altied mieër. Van 2025 mótte we mer aafwachte waat ’t waerdj. Of we dae puzzel oeët good gelag kriege, of we waal de juuste stökskes kènne vinje.
Väör degene die gaer klage, kèn zelfs ich mèt zekerheid zègke, det ge komendj jaor gein klage höbtj. Waer se väöral gelökkig van väöl geld oetgaeve, den moog se ouch in 2025 alle hulp verwachte van webshops, outlets en vekansiediscounters.
Woeë kènse nog van op aan in 2025? De meist betroewbare bank? De aoje driezitter van mien oma. Oet de tied det meubels nog de kans kraege óm antiek te wäöre. ’T Waer? Vanaaf det 1Limburg oze Thijs van de zender haet gehaoldj, wètj ’t waer ’t ouch neet mieër en worsteltj zellef mèt eine identiteitskrisis. Sociale media? Nogal get miense snappe neet mieër zoeë good woeë sociaal väör steit.
De wiesheid die ich zellef van väörig jaor höb mètgenaome, is óm ’t neet te wiet te zeuke. Dök zeen ’t van die klein dinge die ’t versjil kènne make tösse eine gooje en eine slechte daag. 2025 kèn allein mer baeter wäöre as se dao zellef meute väör duis. Mieër meute den oeët, mer ich dink det ’t de meute waerd is.
Gr, Hans
