Onder “Blik op Naer” 4213 vandaag ,
“Naer ‘vredig’ inne snieë” via Har Kuijpers

Noe mèt Noejaor get gedachte bie ein aoj foto.
‘Winter wie im Bilderbuch’. ‘Märchenhaft’. Naer ‘vredig’ inne snieë. Örres róndj 1940. Mesjiens wal op 28 februari 1942, de daag det oos vader waerdje gebaore en hae mèt ei slei nao de kèrk waerdje gebrach óm mer rap geduiptj te waere. Stèl dich väör det ‘Ter Duvel’ d’r in zo kroepe. Det waas in daen tied ei groeater zorg den de Pruse die toe hie ware. ‘Wat meuktj ’t oet of ’t pötje of pötchen mót zeen’ zagte de miense. Det ei ‘pötje’ in good Duuts ei ’töpfchen’ hètj neme we mer väör leef. Mer wiejer inne tied moke ze zich stieëg mieër zorg äöver die Pruse. De ‘Kèrkrazzia’ van zunjig 8 oktoeaber 1944 houdje d’r in. Half Naer ha familie in Pruses mer die kwaam d’r nao d’n aorlog neet äöveral mieër in. Pestoear neumdje de Pruse in zie memoires ‘Het Razende Herrenvolk’. Es of ’t eine titel waas väör eine noewe Suske en Wiske. Eine goje maondj nao de ‘Kèrkrazzia’ mós ouch ’t ‘Bilderbuch’ d’r aan geluive. Inne vreuge mörre van 16 november bloze de Pruse de kèrktoare op, in dae tied de ‘stolz’ van Naer. In de waeke daonao sjaote ze van geenzie de Maas granate en rakette op Naer, blaeve van kèrk en hoezer neet mieër es puinhuip äöver en vele d’r hie en dao ouch doeaje. Laote we haope det dit saort ozel ós bespaardj blieftj.

Ich wins uch, wie eder jaor, ouch dit jaor weer:

Zalig Noejaor
De kat sjietj haor
De hóndj sjietj worst
Zalig Noejaor de braodwors