Wie det kumptj? Mieër geld, mieër vrieje tied en mieër mäögelikhede óm geld in vrieje tied te investere? Det is ein kwestie van welvaart dus. Waat ós gek genóg minstes net zoeë väöl stress bezörgdj as werke. Ós sociaal netwerk is d’r in eder geval neet kleiner op gewaore. Steeds mieër versjillendje klupkes die allemaol hieël väöl nuttige mer väöral ouch gezellige dinge same wille doon. Mer waal toet achter de komma georganiseerdj. Want alles mót spesjaal zeen en geplandj en gereserveerdj wäöre.

In de väörige ieëw woor ‘t neet persé baeter mer waal ein hieël stök äöverzichtelikker. Toen woor dich amesere neet zoeë lestig as noe. De lat loog get lieëger.

Op de ein of angere meneer is ós sosjaal netwerk steeds groeëter gewaore. Gluif ’t of neet, mer det levertj probleme op. Oeët gehuerdj van ’t getal van Dunbar?? Ich toet väör kort ouch neet. Dach det die van Dunbar allein mer fiets- en autobenj moke. Mer ’t getal van Dunbar is volges Wikipedia ’t gesjatj aantal persoeëne woeë ein individu ein stabiele sosjale relasie mèt kèn óngerhaoje. Det aantal is gemiddeld 148. Det liektj väöl, mer asse ein bietje róndjóm dich haer geis kieke en tèlle bósse dao volges mich zoeë aan.

We wäöre dus gemekkelik äövervraogdj mèt as gevolg det we väör de meiste dinge te weinig tied höbbe. “Nae” is mede daodoor inmiddels ein hieël standaard antjwaord op de vraog nao vriewilligers of verenigingsbestuurders.