“op ein gepassioneerde meneer mèt elkaar van meining versjille, verbaal of hieël modern via sosjale media, en de taegepartie, zónger kans van slage, van dien geliek probere te äövertuuge.”

Aangezeen ’t hiej meistal óm meininge geit waerdj väör ’t gemaak mer vergaete det de meiste zake van twieë of mieër kenj bekaeke kènne wäöre en det d’r dus neet ein geliek is. PIN mich d’r neet op vast, mer zoeë is ’t in ver oet de meiste gevalle.

As d’r get is, woeë wae in Nederlandj konstant in de Champions League mèt zooje kènne doon, den is det waal van meining versjille. In Naer hètj det dus sjtraevele. D’r is zelfs eine vrunjegroep in Naer dae zich zoeë haet geneumdj. De Sjtraeveliers. Kiek, det neum ich noe ein gooj dosis zelfkènnis. Chapeau jónges! Det mien eige klupke Neet Good Wies hètj, getuugtj ouch van ieërlik zeen äöver dichzellef. Sjtraeveliers 2 haaj ouch gekèndj, mer den haaje we dao ieeëwig äöver mótte sjtraevele waem ’t meiste aanspraok moog make op dae naam.

Sjtraevele geit dök op zón gepassioneerde meneer det angere d’r last van kènne kriege. As det op eine verjäördaag in de kleine eurkes gebäördj zeen de buure dök óngewildj ’t slachtoffer. Des natuurlik hieël vervaelendj. Kum’se d’r net lekker in, waere dien argumente steeds baeter, steit inèns de pliesie väör de däör. Of kumptj de Riejende Rechter óm de hook loupe óm de bakens van dien diskussie efkes te verzètte.

Sjtraevele kènse echt äövere alle mäógelikke óngerwerpe. ’T is ouch neet persé zoeë desse verstandj van ’t óngerwerp hoofs te höbbe, ’t geit óm ein meining en neet óm de feite. Des helaas waal woeë ’t meistal fout geit. Oppe tillevisie en in sociale media höbbe ze allang in de gate det meininge väöl baeter verkoupe as feite. Väör eine BN-er mèt ein meining is d’r altied waal ein steulke vriej in ein of anger praotprogramma.

Groeëtse naodeil van dees suksesformule is det mèt ’t opwaardere van de meining ouch ’t ónbegrip väör de taegepartie (zoeë zeen de verhaojinge dus inmiddels) al biej väörbaat vast steit.