Mèt miene topografiese tik en op zeuk nao “baeter waer” kóm ich al snel oet op ein of anger eilandj. Mien allervreugste herinnering aan ein eilandj is de houp aerd in ’t water van de Kookepan. Det twieë-postzegels-groeëte böske achter de Kappert. Ein saort einpersoeëns-eilandj. Mer dao is ’t op 30+ daag ouch neet keuler. Dao bate die paar ventilators die d’r róndjóm haer gepaotj zeen ouch neet aan. Die mäöles zörge väör mieër opwèjendj sjtaof en verhitte gemoedere den väör ein paar grade minder.

Get wiejer van hoes kwoom ich oet op de Wadden. Erg leuk op Amelandj, mer drök. Mèt allemaol miense zoeë wie ich. Die egoïsties, arrogant en ein bietje dóm meine det ze de enige zeen die dao de rös en keulte kènne vinje. De eilenjers verdene d’r good geld aan en geliek höbbe ze. Ofsjoeën ’t oppe Wadden waal ’s behueërlik keuler kèn zeen den hiej biej ós, liektj det ouch gein passendje oplossing väör miene hittegolf problematiek.

Ein väöl baeter alternatief vónj ich op Bere Island. Ein eilandj in de baai van sjiereilandj Beara in ’t zuidweste van Ierlandj. Ierlandj, det op zichzelf natuurlik ouch al ein eilandj is. Wieväöl mieër eilandj wilse ‘t höbbe? Zón eilandj woeë de kinjer zjwumles kriege in zieë. Zón eilandj woeë de vaerman zellef de auto’s op ’t vaer mót zètte. Zoeëdet det in eine kieër good geit. Zón eilandj woeë se in de kroeg die ouch postkantoeër is, mós wachte op de volgendje vaerboeët. Gein centerparcs dao en geine boulevard mèt vief sterre hotels. Huuëgstes get verdwaaldje B&B’s. Te heit waerdj ’t d’r zelde. En de haof hoofse d’r waarsjienlik bienao noeët te sproeie. Ein eilandj woeë de gedachte “zón waer bösse ouch snel meug” aanleiding kèn zeen väör ekstreme vermeudjheid.