Wie ’t mèt uch is weit ich neet, mer ich vinj ’t nogal werm. Zón daag wie vandaag lieke eine lange opvleger. Ein paar kieër te snel mèt de uig knippere en d’r loupe al dröppelkes naeve ‘t gezich aaf. Bös se ech drök bezig gewaes en mós se inèns nao ’t huuske, haot d’r den raekening mèt det de hèts ouch dien óngerbóks neet óngemeutj haet gelaote. As of se ein saort twieëdje vel mós aafstruipe. ’t Leefs zooj ich bivakkere in de greuntelaaj van oze keulkas, mer ich höb ’t mótte aaflègge taege eine bloomkoeël en ein zekske sla.
En den die nachte. As se neet wie bevraore in bèd bliefs ligge, löptj de temperatuur allein nog mer op. Biej eder poging toet bewaeging plekt d’r weer ein paar centimaeter tekstiel mieër aan dien lief. Eine nachtmerrie kèn gemekkelik eindige in eine verdrinkingsdoeëd in eige zjweit. Opstaon en get drinke baatj navenantj ouch neet. Asse te rap drinks, liektj ’t as of ‘n half menuut later detzellefdje water alweer äöver diene rök löptj.
Waem good loesterdj, wètj op zón daag det de natuur ós get te zègke haet. “Miense, efkes röstig aan!!” Wie lang det efkes is en waem zich dao äöver aangespraoke mót veule? Dao kome we biej ein serieus pienpuntj. Tig verhaole die eigelik allemaol d’r op neer kome, det we väöral emes de sjöldj mótte gaeve. Mer leefst zoeë wiet mäögelik van ós aaf. Zoeëdet we zellef väöral kènne blieve doon waat we altied al aan ’t doon woore. De klimaatdiskussie in eine notedop.
Óngertösse snap ich ’t Spaanse fenomeen siësta steeds baeter. Zón siësta is nog lang gein fiësta. Good doordach niks doon. De straote in Spanje blieve den laeg. Get waat ich allewiel in Naer ouch dökker zeen. (Zelfs as ’t neet zoeë werm is trouwes.) Geine Spanjaard haoltj ’t zich inne kop óm, as ’t neet nueëdig is, smiddes in de zón te gaon. Vreuger neumdje ich det lui, mer mèt de jaore kumptj ’t besef. Anger waer vreugtj óm anges laeve. Gezóndj verstandj haet neet persé ein hitteplan nueëdig.
Mèt enig angstzweit kiek ich nao de miense die zich mèt dit waer nog enorm inspanne óm de versnelde verangering van ‘t klimaat te óntkènne. Waat det betreft haaj ’t legandariese waertrio Pelleboer, Pien en Paulusma ’n hieël get baeter wèrkklimaat. Eine waerman dae anno 2026 code gael, oranje of roeëd dörftj oet te spraeke, waerdj zónger meute verbaal aafgefakkeltj. Juus op de momente des se dich baeter keduuk kèns haoje. ’t Zal aan de hèts ligke, det sommige luuj prónt mèt dees daag nogal snel aangebrandj zeen.