Ziewaeg en krónkelpaedjes
D’r zeen van die miense die ’t allemaol altied “im griff” höbbe. Häör groeëte doel, det waat ze wille bereike in ‘t laeve. Miense mèt ein missie. Gein idee wieväöl d’r det zeen, mer ich huuër d’r in eder geval neet biej. Simpelweg ómdet ich altied al höb geweite, det neet alles bènne mien macht liktj. Det altied raekening gehaoje mót waere mèt dinge die neet volges plan loupe. As bookhaojer bön ich uiteraard emes van planning en begruuëting, mer ich wèrk ouch gaer mèt väörzieninge en reserves.
Zónger det ’t väöraaf oeët de bedoeling waas, höb ich tösse 2001 en 2023 de meiste tied van mien wakkere laeve in Vènlo doorgebrach. Det waas neet van ’t begin aaf aan ein groeët doel. Mer op d’n door waal erg belangeriek. Zoeë belangeriek, det ich ouch waal ’s slaopendj op kantoeër bön aangetroffe door ein van mien kollega’s. (Gelökkig höbbe ze de foto’s nog). Miene laeve speeldje zich nao verloup van tied meist aaf tösse Naer en Vènlo. Eine drökke autowaeg tösse gezin en wèrk. Al ’t angere in mien laeve wore ziewaeg en krónkelpaedjes.
Örges óngerwaeg kwoom d’r get vervaelends op miene autowaeg. Begós ’t asfalt te sliete, woeëdoor ’t verkieër richting Vènlo aafgeslaote waerdje. Ieërs mèndje ich nog det ‘t väör groeët óngerhaod waas. Later waerdje dudelik, det dae waeg väör mich neet mieër aope zooj gaon. Haaj ich neet väörzeen en ich haaj ouch niks gereserveerdj óm dae noewe laege tied mèt in te vulle.
De ieërste twieë jaor ging ‘t bès good. Waas ich erg drök mèt nao ’t ziekehoes gaon en aanverwante zake. Daonao waerdje ’t anges. Bewaog ich mich eigelik allein nog mer op det waat väörhaen de ziewaeg en de krónkelpaedjes van mien laeve wore gewaes.
Wie good de dokters in dit landj ouch zeen en wieväöl apps we ouch höbbe óm dich de waeg te wieze, hiej leep ich taege ein probleem aan. Zoeë wie det geit mèt ziewaeg en krónkelpaedjes. Dao zeen d’r altied die doeëdloupendj zeen of die nörges oetkome. Soms waerdj eine waeg oeteindelik eine modderpaad. D’r zeen daag des se de waeg kwiet bös. En soms vinj ich simpelweg det ich neet genóg kilomaeters maak op allemaol die noew sjmaal waegskes.
Gelökkig zeen d’r nog steeds väöl ziewaeg die waal de meute waerdj zeen. Kum se mèt krónkelpaedjes op plaatse woeë se anges noeët woors gekome. Zoeë ieërlik mót ich ouch zeen. En ’t groeëte doel, die eindbesjtumming? Gein idee. Mer waarsjienlik haaj ich det ouch neet geweite as ich nog jaore op dae zellefdje autowaeg waas blieve doorrieje.
Gr Hans