Boerderiejewaeg
Waem neet hèltj van taegewindj mót op ein plaats zeker wegblieve. De Boerderiejewaeg. Dao kèn se kome wannieër se wils, doe höbs d’r altied windj taege. Egaal van welke kantj se aafkumps. Zoeë veultj det in eder geval. ’t Zal neet väör niks zeen, det dao windjmäöles neergezatte zeen. Messjien ouch waal ómdet bezjwaore op anger plaatse zjwaorder woge den de bezjwaore vanoet de boetepost van de gemèndje. Ich snap ’t nut en belang van alternatieve enerzjie, mer zón dink inne haof is neet väör ederein ein fieëst. Waat óngerzeuke ouch waal of neet moog oetwieze. As ich d’r allewiel väörbiej fiets, zeen ich dao in dae horizon vol windjmäöles, ein noew LP-hoes van Pink Floyd väör mich. Interessant mer neet persé fraai.
In mien hieël jónge jaore, lang väör de Boerderiejewaeg, haaj ich ‘t al dök aan de stek mèt de windj. Kwaod óm zoeëväöl taegewèrking van hoes nao sjoeël of angesóm. Neet det ’t gebaatj haet, ’t wèjde gewuuën door. Zelfs anno 2026 duit de windj nog steeds woeë d’r zellef zin in haet. Mer ich vónj det ich mien óngenoege bès mèt de windj moogdje deile. Later mèt wielrenne en mèt zoeëmer get fietse kwoom ich d’r achter, det d’r nog väöl mieër Boerderiejewaeg ware. De Pieël, ein en al Boerderiejewaeg. Böggemes veldj van Naer nao Böggeme, meistal Boerderiejewaeg. In Gelderlandj äöver eine diek, Boerderiejewaeg. In Drenthe en Overijssel tösse de weije, absurd väöl Boerderiejewaeg. Groningen? Die provinsie haaj gewuuën Boerderiejewaeg mótte heite. Taegewindj en Boerderiejewaeg zeen eigelik bienao äöveral.
Wie biezunjer is ’t den det parallel aan oze Boerderiejewaeg de geweldige zandjwaeg naeve ’t Aafwateringskenaal liktj? Nog gein 500 maeter d’r vanaaf. Fijn besjöt door get buim. Weinig of geine windj. Waat ein genot. Ok, d’r zeen get koele. Bès väöl eigelik. Minder gesjiktj dus, väör haostige miense mèt weinig stuurmanskunst. Neet perfekt, mer wieväöl van die koele en dörpels kome wae neet taege in ós laeve? Ein bietje besjötting op ziene tied veultj den fijn.
Soms höb se gein keus. Mósse vol door de windj. Äöver eine Boerderiejewaeg. Den is ’t geweldig as se emes höbs dae dich den oet de windj kèn haoje. Soms ouch, as se zelf de bein höbs, kèn se eine angere ‘s oet de windj haoje. En dao hoof se neet persé väör op eine fiets te stappe.
Gr Hans