Woestijnzandj
Dees waek waas ’t den eindelik ‘s ech genete dit jaor. Genete van ’t gooje waer. Vastelaovendj woor waal hertverwermendj, mer die wermte haet de res van mien lief toen noeët bereiktj. Prakkezerendj äöver alle aktuele ozel in de waereld, vroog ich mich vandaag waal aaf of ich mich neet ein hieël klein bietje sjöldig mós veule äöver mien stökske mazzel.
Ouch de zón mót dae twiefel geveuldj höbbe en huldje zich in eine sluier van woestijnzandj. Óm neet al te oetbundig te sjiene? Zandj oet de Sahara volges deskundige. Mer ich gluif d’r niks van. Al die bómme höbbe natuurlik ouch gans väöl sjtaof laote opwèje. Messjien is ’t waal Arabiese zandj. Of bienao net zoeë erg, zandj dae aome Donald ós in de uig probeert te struije. Eigelik weit ich ’t gaaroet neet.
In geval van twiefel höbbe we in dit landj gelökkig altied ein leger aan deskundigen klaor staon. Die ’t allemaol waal snappe. Die ouch geliek mèt vingers wieze. Woeë ’t fout geit, wie ’t waal mót en waem d’r good of fout is. Ónbegriepelik det we mèt zónne massa aan wieze miense geine inkele eige krisis mieër de baas kènne.
De ultieme vrieheid dae wae veule biej eder zien eige geliek, brèngtj ós oeteindelik dus same ouch nörges mieër.
En dus waas ich ouch in twieëdje termien nog steeds erg gelökkig dees waek, mèt dit gooje waer. Zoeëdet ich nao boete kós. In eder geval dae mediastorm aan mich väörbiej kós laote gaon. Zónger det ich mich drök mós make äöver ’t feit of ich dao den waal of neet geliek in haaj.
Gr Hans