L1 duit ’t Plat eweg
In lestige tieje mótte lestige keuzes gemaaktj waere. Ederein kèntj det waal. Eigelik duis se ’t den noeët good en kritiek is den mekkelik geleverdj. En inderdaad, dao gaon ich mich hiej dus ouch sjöldig aan make. Neet ómdet ich mich eine väörvechter väör ’t plat veul. Neet ómdet ich ‘t baeter weit. Want ich weit väöl mieër neet den waal. Mer waal kritiek ómdet ich vinj des se as L1 örges väör mós staon, Des se dien wortels noeët moogs loslaote. Wie modern se ouch wils zeen of wie hel des se ouch mèt de tied wils mèt gaon. As se dich tenminste nog echt wils óngersjeije.
Plat-eweg en nog get angere culturele programma’s mótte d’r dus aan gluive. Op spreekbuis..nl loos ich nog det degene dae die programma’s de nek wiltj ómdrèje bewaertj det ós identiteit in standj mót waere gehaoje. Det ós eige taal belangriek is. Tja, messjien höb ich de kleine lètterkes óngeraan gemistj. Neet ónmäögelik mèt mien ouge. Mer örges veul ich ’t toch sjore.
Ieërder haaj ich al ‘s meute mèt de keuze óm Thijs Zeelen van de zender aaf te haole. ’t Waerberich van Thijs en ouch ziene kollega Léon haaj zoeë äöverdudelik ein lokaal tintje det ’t wegsanere bienao ein kulturele misdaad waas. Väör väöl miense waas ’t stökse Thijs of Léon de hoofdraeje óm nao ’t L1 noets te kieke of loestere. Det we det noe mèt alle respekt gaon vervange mèt ’t bespraeke van waerfoto’s en ’t konsultere van amateur-waermiense oppe radio vinj ich amateurisme van de baoveste plank. Neet van de miense die de biedrages levere, mer waal van de programmamakers.
Det noe de keuze gemaaktj waerdj óm ’t enige programma gerichtj op Limburgse meziek van de (hoofd-)zender te haole kèn ich op gein inkele meneer rijme mèt de bewaering det de Limburgse identiteit en taal in standj mót waere gehaoje. Väöroetgang ómdet ’t loestergedraag van de miense verangerdj? Mèt vage beloftes det de dialektmeziek via internet of zoeëgenaamdje themakenalen waal trök kumptj, kan ich neet zoeëväöl. Miense van eine hoofdwaeg haole en äöver bènnewaegskes sture? Gein wónjer det zoeëväöl luuj de waeg kwiet waere. As d’r gevare mót waere in Limburg det doon we det op de Maas en neet op weer ein noew themakenaal.