Des te mieër respekt krieg ich väör Henk Steijvers van de Janse Bagge Bend. Dae sjraef in ein ver verlaeje neet minder den 75 breeve óm örges aan de bak te kome. Ich gaon d’r vanoet det dae tekst op waorheid beröstj. In eine tied det die breeve nog handjgesjraeve móste zeen!! Allein biej de gedachte al, veul ich de kramp in mien vingers sjete. Toen kósse nog neet 75 kieër dezellefdje breef mèt steeds ein anger adres aafdrökke. D’r waas nog geine chat-gpt en a.i. stóng toen nog väör ad interim. Breeve sjrieve waas ein saort ad interim bezigheid mer is noe óngertösse ein a.i. aangelaegeheid.

In Liefs uit Londen van Bløf waerdje d’r nog ansichtkaarte verstuurdj. Nóg zón historiese hobbie. Vreuger haaj ich standaard ein väörraodje ligke. De kaarte zeen d’r nog waal. De dök kunstige en orzjinele postzegels vervange door ein velke väöl te deure stickers. Zunj eigelik. Zón kaertje in de breevebös blieftj toch net get langer biej dich den ein what’s app berich of ein mailtje. Ein kaertje kèn dich twieë kieër bliej make. Mèt de väör- en achterkantj. Al die digitale berichte met gekopieerde tekste, wie leuk ouch, vlege half of minder gelaeze, rechtstreeks door, ’t digitale universum in.