L.P.
Aafgeloupe waek waerdje d’r ein noe LP oetgebrach van de Janse Bagge Bend. As meziekleefhöbber, mèt “höbber” as belangriek deil van det waord, mós ich die natuurlik höbbe. Oeët höb ich al ’s oetgelag wie belangriek dees manne zeen gewaes väör de dialektpop in ’t algemein en mien muzikale herinneringe in ‘t bezunjer. En väör menige aovendj van plezeer en beer.
Mèt dialekt- en vinylvrundj J. haaj ich aafgespraoke same nao Ulestraote te gaon. Wae haaje die LP bestèldj en asse dich d’r de meute väör dees óm nao Ulestraote te rieje, zatte de manne van JBB d’r nog ein handjteikening op ouch. Óm de reis get mieër cachet te gaeve haaj eine of angere ónverlaot beslaote de A2 aaf te sloete. Zoeëdet allein de echte leefhöbbers de reis nao Ulestraote zooje make. Bienao zeker waas det de raeje det d’r dees kieër gein miense in slaopzak zich aan de ingangspaort van Marlstone haaje vastgeklónke.
Mèt dank aan J., dae van de verkieërmisère gebroek mook óm den mer ein rit (haer en trök) te make langs alle gehuchte tösse Ech en Ulestraote, woore we ruum oppe tied in Ulestraote. Limbrich, Guttekhaove, Wermóndj, Nattehaove, Obbich, Beeg, Sjipperskèrk, Papehaove, Aasterberg, wae zeen d’r gewaes. Prónt wie de Janse Bagge Bend, die waarsjienlik in al dees plaatse in eine hermeniezaal, patronaat, parochiehoes, gemènsjapshoes of fieësttent höbbe gestaon. Óm d’r same mèt ’t publiek ein fieësje van te make.
Gelache, gedrónke en gezónge. Edere kieër det we JBB zooge. Dök ouch van huere zègke achteraaf. Angere kènne zich nog herinnere wie we eine kieër van Helje Dörp aafkwome en door de pliesie wäördje aangehaoje ómdet eine van ós gein achterleeg haaj. Ich weit neet waat d’r gebäördj is, mer nao same efkes in good äöverlègk de straofbare feite te höbbe doorgenaome kóste we doorfietse. Mèt kepót achterleech. Eine angere kieër belandje ein van ós snachs nao ein optraeje biej emes toes biej de hóndj in de manj. ’t Is noeët get gewaore tósse häör en de hóndj, mer èns in de zoeëväöl tied is dae nach ein repeterende bron van plezeer.
Plezeer det ich zoeë good mäögelik probeer te konserveren. Aan mien plezeer-noeëdpakket höb ich de L.P. van Janse Bagge toegevoegdj. Väör as we ze neet mieër live kènne mètmake. Normaal zoot’se den zègke, “gelökkig höbbe we de foto’s nog”. Mer in dae tied haaje we nog nemes eine tillefoon in de tes. Gelökkig mer. Want zoeë höbbe we de kans die herinneringe aaf en toe get biej te kläöre.
Gr Hans