Leef Kwiebusse,

Vanaaf ‘t väörjaor van 2023 haet de kemmissie Historie Kwiebusse uch benaderdj väör gegaeves, foto’s en anger zake äöver de vastelaovendj in Naer. Mèt de hulp van väöl van uch en späörwèrk in archieve, oprope via Gaer nao Naer, ‘t baedele bie miense woeavan det wae dachte det ze waal ’ns sjoean gerei väör òs kòste höbbe, höbbe wae eine hieële houp materiaal verzameldj. Dao kènne de Kwiebusse straks van alles mèt as ze det wille.

Ein tentoeanstèlling haoje, ein lezing mèt sjoean foto’s en dokumente presentere, ein book make en zoeë wiejer.

Om get äöverzich in oos wèrk aan te bringe, höbbe wae in fase 1 gewèrktj aan ’t aktueel make en aanvulle van ‘t Aod-Vorste gedeildje oppe website van De Kwiebusse. Van de lètste jaore höbbe wae de Vorst, zien leus, zien adjudante, zien boekemeisters, zien hoesorde, de sjlager (soms mèt geluid of ein filmke 1952!) de jeugdvorst, en boerebroeëdspaar mèt getuuge vermeldj. En neet te vergaete de vastelaovesgezèt van alle jaore (klik ongerin oppe knoep Kwiebusgezèt 1956) Wae höbbe äöveral de knoep van 1956 gebroektj, ómdet wae in de jaor väör ‘t ieërst ‘t Kwiebuslogo taege kwame. (Waem haet det gemaaktj?)

Van de jaore zònger twieë adjudante, boekemeisters, boerebroeëdspare, hoesorde en zoë wiejer höbbe kènne wae uch natuurlik minder laote zeen.

Van sommige jaore höbbe wae helaas hieël weinig gerei gekraege zoeëdet wae dao bieväörbeeldj gein foto van raod en bestuur kènne laote zeen. Mer ‘t is nog neet te laat: gae kèntj blieve aanlevere. De basis van de aod-vorstepagina’s steit. Die wäöre woeë mäögelik nog aangevuldj. Verder geit alles waat we nog mieër höbbe in ein digitaal Kwiebusarchief. Det is straks ouch via de site van de Kwiebusse te bezeuke. Dae is www.kwiebusse.nl

Via ’t menu vintj gae de aod-vorstepagina’s.

Names de kemmissie, Jos Emonts
j.emonts@home.nl 06-10319899