Zaterdag.
Eine daag in de waek dae wae biej ós zaoterdig neume. Zaterdag. Det is ouch ein leedje van Bløf. Oet Zieëlandj. Messjien daodoor get minder bekèndj in Limburg. Waarsjienlik ómdet Bløf in ‘t zuuje nog steeds as die bend doet Zieëlandj waerdj gezeen en dus minder interessant is väör ós Limburgers. Mer, det is mien vermoede.
Zaterdag steit väör ós väör get biezunjers. Oze jóngste ging zoeë örges róndj of tösse 2011 en 2014 nao ein zaoterdig-vriejetiedsbesteding in Sint Odiliënberg. ’t Brombemke. Edere zaoterdigmörge haaje we dus ein ritje Berg. Öm ’t zoeë gezellig mäögelik te make óngerwaeg, stóng natuurlik de autoradio aan. Op Radio 2. Dao begós edere zaoterdigmörge óm 09:05 oor ’t programma Cappucino mèt “Zaterdag” van Bløf. Gae snaptj des se aan zón 200 kieër “Zaterdag” get äöver hèls de res van dien laeve.
En zoeë kwoom ’t det we in 2018, op zeuk nao ein leuk uitje samen, weer oetkwome biej Bløf. Óngertösse kóste we al väöl mieër gooj leedjes van Bløf. Neet get óm trots róndj te laote zinge door Naer mèndje we.
In ’t deepste geheim ginge we op eine vriedigaovendj nao Rotterdam haer. Bløf steldje neet teleur. Sterker nog, live woor ’t geweldig. Get waat we waal väör ós zellef móste haoje, want mien reputasie as serieus meziekleefhöbber stóng op ’t spel.
Óngertösse zeen we 7 jaor en 8 Bløf-konserte wiejer. Is ’t ein saort vader-zoon tradisie gewaore. Net op ’t moment det ich dach, messjien mótte we mer ’s ein anger tradisie gaon verzinne, pakdje Bløf aafgeloupe zaoterdig weer ’s geweldig oet in Mestreech. De manne woore enorm op dreef. Mèt ónger angere ein geweldige versie van Zaterdag.
Dus, of we volgendje jaor weer gaon? Gein idee. Mer as Zaterdag en zaoterdig op eine daag valle, is d’r weinig raeje óm neet te gaon.
Gr Hans