Veldj 2. Woeë 50 jaor gelaeje nog gein vangnette achter de goale sjtónge. Mèt ’n bietje pech kósse eine aafgewèjde bal gaon haole örges biej de Wienbaek of richting Kessel Eik. Asse gelök haats vlaog de bal de angere kantj op. Gans veldj 1 äöver. Den waerdje dae bal door ‘ne behulpzame kollega van ’n anger team, dae net kwoom aanloupe, waal trökgestamptj. Taege de buus van de aafrastering natuurlik. Zoeëdet se alsnog twieë kieër ónger of äöver ’n aafrastering haer moogdes sjravele.

Veldj 2, de plaats woeë de meist ónbegraepe talente van RKSVN vergaefs gestraeje höbbe väör ieëwige faam. Mer woeë faam oetblaef, waas d’r op veldj 2 waal alle ruumdje óm op angere menere naam te make. Óm väör oore gespreksstof te genere. Zoeëdet de 3e hèlftj behalve beer ouch nog echte inhaod kraeg.

Veldj 2, de plaats woeë miense al oet de bocht vlaoge wie d’r dao nog gein bochte woore. Veldj 2, de plaats woeë de graassprietjes op zaoterdigmiddig laat dök trök kraope in de gróndj. Oet pure vrees verbaal gemillimaeterdj te waere. Veldj 2, de plaats woeë op zunjigmörge waal ’s aaf en toe ‘ne Naerse jóng pas in de 2e hèlftj wakker sjrók óm vervolges aan ‘ne toesjouwer te vraoge of ’t al bienao röst waas. Natuurlik waas veldj 2 ouch de plaats woeë ’t Naerse penaltytoernooi naam haet gemaaktj. Woeë hónger nao de bal väöral gooje dorst opleverdje.

Mer veldj 2 waas ouch de plaats woeë de meiste Naerse jónges en maedjes häöre 1e wedstrijd gevoetbaldj höbbe. In de peuterklas van ’t Naerse voetballe. Vreuger biej de Eetjes en later biej de Efjes. Aangestuurdj door bedachtzame en/of enthousiaste jeugdleiders die op dezelfde gróndj geworteldj woore. Veldj 2. ’n Monument zooj waal op zien plaats zeen gewaes. ’n Wielerbaan mèt de naam “Veldj 2” messjien?

Mer noe waerdj d’r op die zellefdje plaats geraasdj in plaats van gegraasdj. Ich woor d’r neet live getuuge van, mer op de foto’s en filmpkes zoog ’t d’r geweldig oet. Zón peloton det väörbiej raastj. ’t Geluid van good gesjmaerde kèttingen. ’t Geratel van ’t sjakele van de versnellinge. ’t Zoeve van smaal bendjes. Allein mer aaf en toe óngerbraoke door ‘ne vlook, ‘ne lach of ’t snoeve van ’n naas.