Vergriezing
Ein van de groeëtste probleme van deze tied in Nederlandj is de vergriezing. Zelf höb ich d’r ouch las van. Ich dink det ‘t begós zoeë örges róndj 2010. Trökkiekendj op foto’s liektj ‘t dao in eder geval op. Mer erger nog, ich vergries neet allein, ich wäör ouch nog kaal. De oorzaak? Hormonen, familiaire eigesjappe en laefstiel. Det sjrieve meinse die d’r verstandj van höbbe. Volges mien vader en mooder kraege zuuj vreuger dök gries haor van mich. Ich höb op zón momente mer noeët óm óngerbouwdj bewies gevraogdj. Iets zag mich det ’t neet henjig woor óm juust den äöver erfelikheid te beginne.
Zelf mein ich det Oze Leven Hieër, dae alles in zès daag vaerdig mèndje te mótte höbbe, hiej de fout in is gegaon. Teväöl werk, niks oet henj wille gaeve, den kriese van zón dinge. “Haor? Weit ich neet. Regele we later waal. Det gruutj toch vanzellef?” Foute boel! Zoeë kriese gedoons achteraaf. D’n eine waerdj kaal, d’n angere gries en sommige blieve ieëwig mèt eine gezónje bós krolle loupe. Ein dink is zeker, ’t is toen neet good geregeldj en wae zitte d’r noe weer mèt te kieke.
Door alles mer te laote gebäöre zitte wae noe mèt teväöl gries. Menigein duit nog waal zien bèst mèt angere kläöre oet ein fleske. Mer det baatj ouch neet ech oppe lange termien. De miense die d’r äöver gaon in de regering, op ministeries en zoeë, haaje dit kènne zeen aankome. Mer ouch die dachte “laot mer gaon.” Tja en noe zitte we den mèt de henj in ’t haor. Tenminste degene die det nog kènne.
Te weinig miense die väör teväöl anger miense mótte gaon zörge. Neet allein in de zörg, mer ouch in winkels, in de landj- en tuinbouw. Jao woeë eigelik neet?
Väörluipig zeen arbeidsmigranten, mantjelzörgers en vriewilligers de miense die ós oppe bein mótte gaon haoje. ‘t Scenario det aojers weer biej häör wichter mótte gaon inwoeëne is neet óndinkbaar. Bienao net zoeë zeker as ‘t scenario det kinjer nog mer mèt meute kènne oetvlege. Dees diskussie is aan ós rónj taofel al ‘s geveurdj. We zeen d’r nog neet oet. Mer we zeen d’r al op väörbereidj, det d’r in de wintjerdaag saoves weer dök aojerwèts gejokerdj geit wäöre mèt opa en oma.
Gr Hans
