Van zweve nao zwalke.
As we de miense die d’r verstandj van höbbe mótte geluive, is d’r aafgeloupe waeke massaal gezweefdj in Nederlandj. Aangeblaoze door windj en taegewindj. Van links en rechts. Of rechts en links. As ich neet baeter zooj weite, zooj ich dinke det wae door die polarizasie strakkes ouch nog mèt eine Oostpool en eine Westpool zitte te kieke.
Zwevendje miense die kanaalzjwummendj van tillevisiezender nao tillevisiezender sparteldje. Op zeuk nao ein gooj plaats óm te lanje. Gein gemekkelike klus mèt dae neet te peile herfstwindj.
Zweve baove zón sjtumbiljet liektj mich neet prettig. Worstelendje keezers, zooj messjien in dees kwestie ein baeter ómsjrieving zeen. Det worstele kriegtj in ’t sjtumhökske trouwes ein lollig vervolg. Dao is gaaroet gein plaats óm te zweve. Die hökskes passe ouch allang neet mieër biej de breij sjtumbiljette. Oetvouwe wiltj nog waal lökke, mer probeer den nog mer ’s det zaakje trök te vouwe nao de orzjinele staot.
Noe ós op de Ziggo-zenders 1, 2, 3, 4, en 6 door de allang neet mieër objectieve politieke verkIeërsregelieërs is väörgekauwdj woeë ’t neet haer mót, zweve de meiste kezers dus. Wie ein opgeblaoze mer nog neet toegeknuipdje ballon. Die inèns waerdj losgelaote, ónkontroleerbaar slingerendj baove ’t sjtumbiljet. Want asse wèts woeë ’t neet haer mót, wiltj det neet zègge desse den vanzelf wèts, woeë ’t waal haer mót.
En dus zitte we strakkes nao zwevendje keezers mèt zwalkendje politici te kieke. Die waal belaove det we 100.000 hoeze gaon bouwe, mer gein idee höbbe wie ze det in de echte waereldj geregeldj mótte kriege. Of waem die mót bouwe? Neet väör niks dach ich aanvankelik det Polarizasie ouch get mèt bouw, sperjes staeke en besse plökke te make haaj.
GR Hans